ភ្នំពេញ៖ កាលពីវេលាម៉ោង១២ និង៣០នាទីយប់រំលងអាធ្រាត្រឈានចូលថ្ងៃទី២៩ ខែមិថុនា ឆ្នាំ២០១៦ កម្លាំងល្បាតនគរបាលប៉ុស្តិ៍ស្ទឹងមានជ័យ បានសហការជាមួយកម្លាំងការិយាល័យព្រហ្មទណ្ឌកំរិតធ្ងន់ និង កម្លាំងអន្តរាគមន៍ពិសេស នៃស្នងការដ្ឋាននគរបាលរាជធានីភ្នំពេញ បានឃាត់ខ្លួនជនសង្ស័យ២នាក់(ប្តី.ប្រពន្ធ) ពីបទ ជួញដូរដោយខុសច្បាប់នូវសារធាតុញៀន នៅចំណុចផ្លូវចោមចៅ ភូមិដំណាក់ធំ២ សង្កាត់ ស្ទឹងមានជ័យ ខណ្ឌមានជ័យ រាជធានីភ្នំពេញ ពីបទជួញដូរដោយខុសច្បាប់នូវសារធាតុញៀន។
សមត្ថកិច្ចបានឲ្យដឹងថា ជនសង្ស័យមានឈ្មោះ១-ឈ្មោះសឿន ចន្ធី ភេទប្រុស អាយុ៣៧ ឆ្នាំមុខរបរ មិនប្រាកដ ស្នាក់នៅចល័តតាមផ្ទះសំណាក់ ក្នុងរាជធានីភ្នំពេញ (ឃាត់ខ្លួន) និងទី២-ឈ្មោះ ហៃ ស្រីរ័ត្ន ភេទស្រី អាយុ២២ឆ្នាំ មុខរបរមិនប្រាកដ ស្នាក់នៅចល័តតាមផ្ទះសំណាក់ ក្នុងរាជធានីភ្នំពេញ (ឃាត់ខ្លួន) ។
សមត្ថកិច្ចបន្តថា មុនពេលឃាត់ខ្លួន កម្លាំងល្បាតបានប្រទះឃើញជនសង្ស័យជិះម៉ូតូតាមផ្លូវមានការសង្ស័យក៏ឃាត់ត្រួតពិនិត្យឆែកឆេររកឃើញក្រាមពណ៌សថ្លាចំនួន៣កញ្ចប់ថង់ (កញ្ចប់ធំ០១,កញ្ចប់តូច០២) ក៏ឃាត់ខ្លួនតែម្តង។ ក្នុងនោះសមត្ថកិច្ចបានចាប់យកវត្ថុតាងរួមមាន៖ ក្រាមពណ៌សថ្លា៣កញ្ចប់ថង់ (កញ្ចប់ធំ០១,កញ្ចប់តូច០២), ជញ្ជីងអេឡិចត្រូនិច០១គ្រឿង,សំបកថង់ប្លាស្ទិចមួយចំនួន និង ម៉ូតូ០១គ្រឿងម៉ាកអេសអិល ពណ៍ស ពាក់ស្លាកលេខ ភ្នំពេញ 1BD-6333។
បច្ចុប្បន្នសមត្ថកិច្ចកំពុងធ្វើការសាកសួរ ដើម្បីកសាងសំណុំរឿងតាមនីតិវិធីទៅសាលាដំបូងរាជធានីភ្នំពេញ៕
ដោយ៖ សុខ ខេមរា
