ភ្នំពេញ៖ ទើបនឹងប្រកាសអំពីសមាសភាពចូលរួមសម្តែងក្នុងខ្សែភាពយន្តភាគថ្មីរបស់ទូរទស្សន៍ប៉ុស្តិ៍លេខ៥ រឿង «ហង្សបាក់ស្លាប» មិនទាន់បានប៉ុន្មានផងស្រាប់តែពេលនេះលេចចេញដំណឹងថា តួអង្គសំខាន់គឺកញ្ញា អាលីហ្សា ត្រូវបានដកចេញ និងដាក់ជំនួសដោយតារាសម្តែងស្រីថ្មីផ្សេងវិញ។

ការដកតំណែងតួឯកភ្លាមៗនេះគឺក្រោយពីតារាស្រីរូបនេះមិនមានពេលគ្រប់គ្រាន់ដើម្បីសម្តែង។

កាលពីថ្ងៃទី២២ ខែមិថុនា នេះខ្សែភាពយន្តរឿង «ហង្សបាក់ស្លាប» ដែលផលិតដោយក្រុមផលិតករថៃ ដែលតារាសម្តែងរាងស្រឡូន កញ្ញា អ៊ុន អាលីហ្សា បានកាន់តំណែងជាតារាសម្តែងជាថ្មីក្រោយពីបាត់មុខក្នុងការងារសម្តែងអស់ជាងពីរឆ្នាំហើយនាងនឹងប៉ះជាមួយតួឯកប្រុសលោក យិត មាសឧស្សាហ៍ ។ ប៉ុន្តែដំណឹងចុងក្រោយដែលទទួលបានគឺតំណែងតារាស្រីវ័យ២៩ឆ្នាំរូបនេះត្រូវបានផ្លាស់ប្តូរបន្ទាន់ព្រោះតែនាងមិនមានពេលគ្រប់គ្រាន់ក្នុងការសម្តែងដែលត្រូវចំណាយពេជាច្រើនខែ ។

ប្រភពពីតារាសម្តែងម្នាក់លើកឡើងថា មិនមានទំនាស់ណាមួយពីការដកតំណែងតួឯកស្រីនេះទេព្រោះតែនាងទើបនឹងទទួលបានលទ្ធផលចេញទៅសម្តែងនៅប្រទេកាណាណានៅ២ខែទៀតខណៈដែលការសម្តែងត្រូវចំណាយពេលច្រើនជាងពីរខែ។ ប្រភពបន្តថា ដើម្បីកុំឲ្យមានបញ្ហាពោលគឺមុនពេលខ្សែភាពយន្តនេះថតបានច្រើនភាកនាងបានសម្រេចចិត្តស្នើឲ្យមានការផ្លាស់ប្តូរ។

ផលិតករមួយរូបប្រចាំនៅប៉ុស្ដិ៍លេខ៥ បានអះអាងថា អាលីហ្សា ត្រូវបានប្ដូរចេញហើយ ប៉ុម្តែមិនមែនបណ្ដាលមកពីនាងសម្ដែងមិនសមនឹងតួឯកប្រុសដែលមានវ័យក្មេង ឬបណ្ដាលមកពីនាងសម្ដែងជាក់ស្ដែងមិនបានល្អតាមការចង់បាននោះទេ។ ប៉ុន្តែបញ្ហាដែលបានកើតឡើងគឺបណ្ដាលមកពីនាងជាប់តេស្ដទៅច្រៀងនៅក្រៅប្រទេសក្នុងពេលដែលខាងផលិតករមិនអាចថតឈុតខ្លះ ហើយរង់ចាំឲ្យនាងមកវិញ ទើបបន្តថតបញ្ចប់បាន។ លោកថា អាលីហ្សា ត្រូវបានសម្រេចដូរចេញបន្ទាប់ពីនាងបានលើកហេតុផលមកប្រាប់វិញថា នាងបានជាប់កិច្ចសម្ភាសន៍ ហើយត្រូវទៅច្រៀងនៅក្នុងប្រទេសមួយរហូតដល់ច្រើនសប្ដាហ៍។

ថ្លែងស្រដៀងគ្នានេះដែរកញ្ញា អាលីហ្សា បានបញ្ជាក់យ៉ាងខ្លីថា នាងពិតជាត្រូវគេដូរចេញមិនឲ្យបន្តការសម្ដែងក្នុងរឿង «ហង្សបាក់ស្លាប» ដែលបានប្រកាសឡើងមែន ប៉ុន្តែមិនមែនដោយសារតែគេមិនពេញចិត្តទេគឺដោយសារតែនាងដាក់សំណើសុំឈប់តែម្ដង ដើម្បីកុំឲ្យជាន់គ្នាជាមួយនឹងការសម្ដែងនៅប្រទេសកាណាដា។ នាងអាចនឹងចេញទៅសម្តែងនៅប្រទេសកាណាដានៅពីរខែទៀត ជាមួយនឹងលោកអេនឌី ដូចនេះនាងមិនចង់ឲ្យមានបញ្ហាទោះបីសម្រេចចិត្តរួមគ្នាជាមួយផលិតករដោះដូរតួឯកស្រីតែម្តង ប៉ុន្តែនាងមិនទាន់ដឹងនៅឡើយទេថា តើតារាស្រីរូបណានឹងត្រូវជំនួសតំណែងនាងវិញនោះ។

គួរបញ្ជាក់ដែរថា ខ្សែភាពយន្តភាគថ្មីរឿង «ហង្សបាក់ស្លាប»  នឹងត្រូវចូលរួមសម្តែងដោយតារាសម្តែងប្រុសស្រីល្បីឈ្មោះជាច្រើនដួងដូចជា កញ្ញា  អ៊ុន អាលីហ្សា, លោក យិត មាសឧស្សាហ៍, កញ្ញា ទឹម រដ្ឋា, លោក សេង រតនៈ,  កញ្ញា លីហ្សា, កញ្ញា ម៉ានីកា, កញ្ញា ណាម៉ុច, កញ្ញា នីតា, វរៈវង្ស, លោក ហេង តារា, កញ្ញា សយ រចនា, លោក ជួន វឌ្ឍនៈ, កញ្ញា សួង សារ៉ានិត, លោក ប៉េង ទី និងលោក លៀង ឧត្តម ជាដើម៕

ដោយ៖ វឌ្ឍនា