ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ក.ប.ប បានឱ្យដឹងនៅព្រឹកថ្ងៃទី១០ ខែសីហា ឆ្នាំ២០២៣នេះថា៖ មន្រ្តីជំនាញ ក.ប.ប. សាខាខេត្តសៀមរាប ខេត្តកំពត ខេត្តស្វាយរៀង និងខេត្តកំពង់ធំ កាលពីម្សិលមិញនេះ បានចាត់វិធានការតាមច្បាប់លើដេប៉ូប្រេងឥន្ធនៈចំនួន ២ទីតាំង ក្នុងចំណោម ១៤ទីតាំងក្រោយពេលមន្រ្តីជំនាញចុះត្រួតពិនិត្យឃើញថាមិនមានអនុលោមភាពដោយពិន័យអន្តរការណ៍ទៅតាមនីតិវិធី។
គួរបញ្ជាក់ផងដែរថា មន្រ្តីជំនាញ ក.ប.ប. មានតួនាទីសំខាន់ក្នុងការទប់ស្កាត់អំពើមិនសុចរិតភាពក្នុងធុរកិច្ច និងការពារសិទ្ធិរបស់អ្នកប្រើប្រាស់ទូទៅក្នុងព្រះរាជាណាចក្រកម្ពុជា។
ជាមួយគ្នានោះ មន្ត្រីជំនាញ ក.ប.ប. សាខាខេត្តកែប និងខេត្តកោះកុង បន្តចុះត្រួតពិនិត្យរាល់ទំនិញដែលដាក់ចរាចរលក់នៅលើទីផ្សារ និងសិប្បកម្មនានាដើម្បីទប់ស្កាត់នូវទំនិញដែលខូចគុណភាពនិងហួសកាលបរិច្ឆេទ ឬទំនិញដែលមិនអនុលោមតាមបទប្បញ្ញត្តិបច្ចេកទេសដែលប៉ះពាល់ដល់សុខុមាលភាពប្រជាពលរដ្ឋទូទៅ ក៏ដូចជាអ្នកប្រើប្រាស់ផងដែរ។
ជាលទ្ធផលជាក់ស្ដែងនៃការចុះត្រួតពិនិត្យ មន្ត្រីជំនាញ ក.ប.ប. បានរកឃើញ និងដកហូតទំនិញហួសកាលបរិច្ឆេទប្រើប្រាស់និងខូចគុណភាពចំនួន ៩២.៨គីឡូក្រាម៕
ដោយ៖សហការី
