ខេត្តស្វាយរៀង: ជនសង្ស័យម្នាក់ក្នុងចំណោម១១នាក់ត្រូវបានសមត្ថកិច្ចនគរបាលឃាត់ខ្លួនពាក់ពន្ធ័ករណីប្រើហិង្សាកាប់ម៉ូតូយ៉ាងសន្ធាប់សំណាងម្ចាស់រត់គេចខ្លួនទាន់។

ហេតុការណ៍នេះបានកើតឡើងកាលពីវេលាម៉ោង៤និង៣០នាទីល្ងាចថ្ងៃទី៩ ខែសីហា ឆ្នាំ២០២៣ នៅត្រង់ចំណុចភូមិវាល ឃុំម៉ឺនជ័យ ស្រុករំដួល ។
យោងតាមសមត្ថកិច្ចនគរបាលស្រុកបានអោយដឹងថាជនសង្ស័យមានឈ្មោះសុខ សាវ៉ាត់  អាយុ២០ឆ្នាំ មុខរបរជាងជួសជុលម៉ូតូ មានទីលំនៅភូមិម្រះព្រៅ ឃុំត្រពាំងស្តៅស្រុករមាសហែក។

ចំណែកជនរងគ្រោះមានឈ្មោះឆាយ សម្បត្តិ  អាយុ១៧ឆ្នាំមានទីលំនៅភូមិវាល ឃុំម៉ឺនជ័យ ស្រុករំដួល រីឯម៉ូតូម៉ាកហុងដាC125ពណ័ខ្មៅសេរីឆ្នាំ2021ស្វាយរៀង1Q6532រងការខូចខាតផ្នែកខាងមុខយ៉ាងដំណំ។

បើតាមសាក្សីបានអោយដឹងថា មុនកើតហេតុមានក្រុមក្មេងស្ទាវចំនួន០១ក្រុមមានគ្នាប្រហែល១១នាក់បានជិះម៉ូតូ៦គ្រឿង ហើយបានដេញវាយឈ្មោះជនរងគ្រោះកំពុងជិះម៉ូតូមួយគ្រឿងម៉ាកហុងដាC125ពណ៌ខ្មៅសេរីឆ្នាំ2021ស្វាយរៀង1Q6532 បណ្ដាលអោយដួលរួចផ្តួលម៉ូតូចោលរត់គេចខ្លួនភ្លាមៗតែម្ដង។

ក្រោយពីធ្វើសកម្មភាព រួចក្រុមជនសង្ស័យបានជិះម៉ូតូឆ្ពោះទៅទិសខាងជើងត្រូវបានសមត្ថកិច្ចដេញចាប់និងឃាត់ខ្លួនជនសង្ស័យបានម្នាក់យកមកសាកសួរ។

នៅចំពោះមុខសមត្ថកិច្ចជនសង្ស័យបានឆ្លើយសារភាពថាខ្លួន និងបក្ខពួកពិតជាបានរួមគ្នាធ្វើសកម្មភាពកាប់បំផ្លាញម៉ូតូជនរងគ្រោះប្រាកដមែនទើបសមត្ថកិច្ចកសាងសំណំុរឿងចាត់ការបន្តតាមច្បាប់៕ដោយ៖សុថាន