ភ្នំពេញ ៖ រថយន្តដឹកសុីម៉ង់ត៍មួយគ្រឿង បើកបរក្នុងល្បឿនលឿនហ្វ្រាំងមិនជាប់រេចង្កូតឡើងសួនទ្រូងផ្លូវ ក្រឡាប់សង្កត់ទៅលើរថយន្ត២គ្រឿង បណ្តាលឱ្យរងខូចខាត កាលពីវេលាម៉ោង៦និង២០នាទីព្រឹក ថ្ងៃទី២១ខែសីហា ឆ្នាំ២០២៣ នៅតាមមហាវិថីឈ្នះ ឈ្នះ មុខរោងចក្របឺរី ភូមិព្រៃស្វាយ សង្កាត់ចោមចៅទី៣ ខណ្ឌពៅធិ៍សែនជ័យ ។

តាមប្រភពនៅកន្លែងបានឲ្យដឹងថា មុនកើតហេតុ រថយន្តម៉ាកហុីយ៉ាន់ដាយ ពណ៌ស ពាក់ស្លាកលេខ ព្រះសីហនុ 3A-6166 ដឹកសុីម៉ង់ត៍ពេញទ្រុង ចេញពីផែស្ងួតតេងឡាយ បើកបរក្នុងទិសដៅពីជើងទៅត្បូង ល្បឿនលឿន លុះមកដល់ចំណុចកើតហេតុ ស្របពេលដែលមានកម្មករឆ្លងកាត់ចូលរោងចក្រ ជាន់ហ្វ្រាំងតែមិនជាប់ ម្យ៉ាងដឹកធ្ងន់ផង រេចង្កូតឡើងសួនទ្រូងផ្លូវ ក្រឡាប់ផ្ងារជើងសង្កត់លើរថយន្ត២គ្រឿងរងខូចខាត មួយគ្រឿងម៉ាកកូរ៉ូឡា ពណ៌ស្ករ ពាក់ស្លាកលេខ ភ្នំពេញ 2AO-0826 សង្កត់ជាប់ពីលើ មួយគ្រឿងទៀតម៉ាកម៉ាស្តា ពណ៌ស ពាក់ស្លាកលេខ ភ្នំពេញ 2BO-7378 បោកប៉ះផ្នែកខាងក្រោយ ខណៈដែលរថយន្តកំពុងបើកស្របទិសគ្នាទាំងអស់ ។

ក្រោយកើតហេតុ សមត្ថកុច្ចចុះទៅអន្តរាគមន៍ សម្រួលចរាចរណ៍ និងប្រគល់ឱ្យការិយាល័យចរាចរជើងគោក ស្នងការក្រុងភ្នំពេញ ចាត់ចែងស្ទូចលើកយករថយន្តទាំងអស់ចេញ យកទៅរក្សាទុក ដោះស្រាយតាមនីតិវិធី ៕ដោយ៖សុខាសែនជ័យ