អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ត្រូវបានបញ្ជូនទៅពន្ធនាគារក្នុងទីក្រុងបាងកក បន្ទាប់ពីបង្ហាញខ្លួននៅតុលាការកំពូល។

ទីភ្នាក់ងារព័ត៌មាន Reuters បានរាយការណ៍កាលពីថ្ងៃទី 22 ខែសីហា ដោយដកស្រង់សេចក្តីថ្លែងការណ៍របស់តុលាការកំពូលប្រទេសថៃថា អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា ត្រូវបានកាត់ទោសឱ្យជាប់ពន្ធនាគាររយៈពេល 8 ឆ្នាំពីបទចោទប្រកាន់ផ្លូវច្បាប់កន្លងមក។ ការសម្រេចនេះបានកើតឡើងតែប៉ុន្មានម៉ោងបន្ទាប់ពីលោកថាក់ស៊ីនបានត្រឡប់មកប្រទេសវិញក្រោយពីបាននិរទេសខ្លួនអស់រយៈពេល១៥ឆ្នាំ។
ការកាត់ទោសលោកថាក់ស៊ីន រួមមានការចោទប្រកាន់ចំនួនបីផ្សេងគ្នា គឺពីបទរំលោភអំណាច ការប្រព្រឹត្តខុសដោយអនុញ្ញាតឱ្យធនាគាររបស់រដ្ឋមួយចេញប្រាក់កម្ចីពីបរទេស និងកាន់កាប់ភាគហ៊ុនដោយខុសច្បាប់ក្នុងនាមអ្នកដទៃ។
យោងតាមសារព័ត៌មាន Reuters ភ្លាមៗបន្ទាប់ពីការបង្ហាញខ្លួនរបស់គាត់នៅតុលាការកំពូល លោកថាក់ស៊ីន ត្រូវបានគេនាំទៅកាន់មជ្ឈមណ្ឌលឃុំឃាំងទីក្រុងបាងកកនៃបរិវេណពន្ធនាគារ Klong Prem ក្រោមសន្តិសុខយ៉ាងតឹងរ៉ឹង។
មុននេះបន្តិច អ្នកនាំពាក្យតុលាការថៃ លោក Sorawit Limparangsi បាននិយាយថា លោកថាក់ស៊ីន នឹងត្រូវបង្ហាញខ្លួននៅចំពោះមុខតុលាការកំពូលនៅម៉ោង ១០និង៣០នាទីព្រឹក ថ្ងៃទី២២ ខែសីហា (ម៉ោងក្នុងតំបន់) ដើម្បីស្តាប់សាលក្រម។ សមាជិកគ្រួសារលោក ថាក់ស៊ីន ក៏ត្រូវបានអនុញ្ញាតឱ្យចូលរួមក្នុងបទបង្ហាញនេះដែរ។
លោកថាក់ស៊ីន អាយុ៧៤ឆ្នាំ ត្រូវបានកាត់ទោសឱ្យជាប់ពន្ធនាគាររយៈពេល១០ឆ្នាំកំបាំងមុខក្នុងអំឡុងពេលនិរទេសខ្លួន លើបទចោទប្រកាន់ព្រហ្មទណ្ឌចំនួន៤ ពាក់ព័ន្ធនឹងការចោទប្រកាន់ពីបទពុករលួយ និងការរំលោភបំពានអំណាច ដែលមួយក្នុងចំណោមនោះបានផុតកំណត់ហើយ។
គេមិនដឹងថា តើលោក ថាក់ស៊ីន អាចនឹងត្រូវជាប់ពន្ធនាគាររយៈពេលប៉ុន្មាននោះទេ។ សហការីរបស់គាត់សង្ឃឹមថា អតីតនាយករដ្ឋមន្ត្រីអាចត្រូវបានផ្ទេរទៅឃុំឃាំងក្នុងផ្ទះ បន្ទាប់ពីការឃុំខ្លួនរយៈពេលខ្លី ទោះបីជាមិនមានការធានាចំពោះរឿងនេះក៏ដោយ។
លោកថាក់ស៊ីនបានឡើងកាន់អំណាចក្នុងឆ្នាំ២០០១។ ប៉ុន្តែនៅខែកញ្ញា ឆ្នាំ២០០៦ នៅពេលដែលលោកថាក់ស៊ីននៅទីក្រុងញូវយ៉កកំពុងរៀបចំនិយាយនៅចំពោះមុខអង្គការសហប្រជាជាតិ យោធាបានចូលកាន់កាប់៕ ដោយធីរីណា

រូប​ថត​: ĐTTCO