ភ្នំពេញ ៖ នៅល្ងាចថ្ងៃទី២២ ខែសីហា ឆ្នាំ២០២៣ កម្លាំងនាយកដ្ឋាននគរបាលព្រហ្មទណ្ឌបានតាមប្រមាញ់និងឃាត់ខ្លួន មេខ្លោងគ្រឿងញៀនដែលត្រូវជាប់ទោស៥២ឆ្នាំពីបទជួញដូរគ្រឿងញៀនចំនួន២លើក ហើយមានក្រុមជនបិទមុខ៦នាក់បានបើករថយន្តមួយគ្រឿងមកភ្ជង់សមត្ថកិច្ច រួចរំដោះមេខ្លោងជាអ្នកទោសនោះដើម្បីគេចខ្លួននៅគ្លីនិកពេទ្យធ្មេញមួយកន្លែងក្នុងខេត្តសៀមរាប កាលពីថ្ងៃទី ១៧ ខែសីហាឆ្នាំ២០២៣។

សូមរំលឹកថា កាលពីថ្ងៃទី១៧ ខែសីហាឆ្នាំ ២០២៣ កន្លងទៅនេះ មានបទល្មើសមួយបានកើតឡើង ដោយមានក្រុមឧក្រិដ្ឋជនបើកបររថយន្ត Lexus មកភ្ជង់រំដោះអ្នកទោស ដែលទីតាំងកើតហេតុនៅក្បែរបបរសរាជនី គ្លីនិកពេទ្យធ្មេញ ស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប។

ប៉ុន្តែទោះជាយ៉ាងណាកម្លាំងសមត្ថកិច្ចគ្រប់លំដាប់ថ្នាក់ រាជធានី ខេត្ត បានសហការគ្នាបើកប្រតិបត្តិការស៊ើបអង្កេតជុំវិញរឿងរ៉ាវក្រុមបិទមុខរំដោះអ្នកទោស ដេលជាមេខ្លោងគ្រឿងញៀនត្រូវផ្តន្ទាទោសដាក់ពន្ធនាគារខេត្តសៀមរាបចំនួន៥២ឆ្នាំ ហើយមេខ្លោងរូបនេះទើបតែឃុំខ្លួននៅពន្ធនាគារបានរយៈពេល១៤ឆ្នាំប៉ុណ្ណោះ ។ 

រហូតកម្លាំងសមត្ថកិច្ចធ្វើការឃាត់ខ្លួនបានជាបន្តបន្ទាប់ចំនួន៧នាក់ដែលជាក្រុមជនបិទមុខដែលធ្វើសកម្មភាពរំដោះអ្នកទោសដែលជាមេខ្លោងកាលពីថ្ងៃទី១៨ ខែសីហា ឆ្នាំ២០២៣ ។ ទោះជាយ៉ាងណាកម្លាំងសមត្ថកិច្ចខំប្រឹងប្រែងស៊ើបអង្កេតដើម្បីតាមស្វែងរកឃាត់ខ្លួន មេខ្លោងដែលត្រូវរំដោះជាពិរុទ្ធជនរូបនោះ រហូតឈានដល់ការឃាត់ខ្លួនមេខ្លោងរូបនោះ ដោយនាយកដ្ឋាននគរបាលព្រហ្មទណ្ឌ ដឹកនាំប្រតិបត្តិការដោយលោកឧត្តមសេនីយ៍ត្រី ហ៊ុន មុន្នីរ័ត្ន និងលោកវរសេនីយ៍ឯក ហែម បូណា អនុប្រធាននាយកដ្ឋាន និងលោកវរសេនីយ៍ឯក ឆាន់ គឹមលី ជំនួយការលោកអគ្គស្នងការរងនគរបាលជាតិ បានដឹកនាំកម្លាំងជំនាញរបស់នាយកដ្ឋាននគរបាលព្រហ្មទណ្ឌ ដោយដឹកនាំសហការជាមួយនឹងអធិការដ្ឋាននគរបាលខណ្ឌជ្រោយចង្វា ធ្វើការស្រាវជ្រាវនិងចាប់បង្រ្កាបចំនួន០២ទីតាំងផ្សេងៗគ្នា នៅចំណុចអាកាសយាន្តដ្ឋានអន្តរជាតិ ភ្នំពេញ ខណ្ឌពោធិ៍សែនជ័យ រាជធានីភ្នំពេញ និងបូរីអូគីដេ ផ្លូវ៦អា ស្ថិតក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។ ជារួមក្នុងរង្វង់ប្រតិបត្តិការនេះ កម្លាំងសមត្ថកិច្ចជំនាញបានចាប់មេខ្លោងដែលរំដោះ និងបក្ខពួកដែលជាអ្នកឃ្លាំមើលនិងសង្កេតការការណ៍ជុំវិញទីតាំង សរុប៣នាក់បន្ថែមទៀត នាល្ងាចថ្ងៃទី២២ ខែសីហា ឆ្នាំ២០២៣។ 

បច្ចុប្បន្ន សមត្ថកិច្ចបានបញ្ជូនខ្លួន ពិរុទ្ធជនជាមេខ្លោងរូបនេះទៅកាន់ នាយកដ្ឋាននគរបាលព្រហ្មទណ្ឌដើម្បីចាត់ការតាមនីតិវិធី៕ ដោយ រ៉ារ៉ា