ខេត្តកំពង់ស្ពឺ៖ កម្មករកម្មការិនីចំនួន២៨នាក់ ដែលកំពុងជិះលើរថយន្តទៅធ្វើការរោងចក្រជួបគ្រោះថ្នាក់ចរាចរណ៍ រថយន្តបែកកង់បណ្ដាលឲ្យក្រឡាប់ រងរបួសធ្ងន់ស្រាលចំនួន៩នាក់កាលពីព្រឹកថ្ងៃទី៣០ ខែមិថុនា ឆ្នាំ២០១៦ នៅលើកំណាត់ផ្លូវជាតិលេខ៤៤ ចំណុចគីឡូម៉ែត្រលេខ២០-២១ ភូមិអូរនាងហ៊ីង ឃុំទំព័រមាស ស្រុកសំរោងទង ខេត្តកំពង់ស្ពឺ ។
សមត្ថកិច្ចបានឲ្យដឹងថា រថយន្តក្រឡាប់នេះម៉ាក ហីយ៉ាន់ដាយ (តួរីស) ពាក់ស្លាកលេខ ភ្នំពេញ 2F-7474 ដឹកកម្មករកម្មការិនីចំនួន២៨នាក់ចេញពីភូមិដើម្បីទៅធ្វើការរោងចក្រ ប៉ុន្តែមកដល់ចំណុចខាងលើរថយន្តក៏បានបែកកង់ខាងក្រោយផ្នែកខាងស្ដាំបណ្ដាលឲ្យក្រឡាប់ ជះកម្មករកម្មការិនីចេញពីរថយន្ត រងរបួសចំនួន៩នាក់ក្នុងនោះមានស្រី៨នាក់។
សមត្ថកិច្ចបានបញ្ជាក់ថា ជនរងគ្រោះក្នុងហេតុការណ៍នេះរួមមាន១-មៀច ស្រីអូន ភេទស្រី អាយុ២២ឆ្នាំ របួសស្រាល ២-ផន ផល ភេទស្រី អាយុ២២ឆ្នាំ របួសធ្ងន់ អ្នកទាំងពីររស់នៅភូមិដីឆ្នាំង ឃុំហោសំណម ស្រុកឱរ៉ាល់ ៣-យឹម ធីតា ភេទស្រី អាយុ២៣ឆ្នាំ របួសស្រាល ៤-ផាន់ សុភា ភេទស្រី អាយុ២៤ឆ្នាំ របួសស្រាល អ្នកទាំងពីររស់នៅភូមិក្រាំង ឃុំហោសំណម ស្រុកឱរ៉ាល់ ៥-ជូ ចន្ថា ភេទស្រី អាយុ២៣ឆ្នាំ របួសធ្ងន់ ៦-សែម ស្រីតូច ភេទស្រី អាយុ១៩ឆ្នាំ របួសស្រាល ៧-ឃុន ចាន់ធីម ភេទស្រី អាយុ២៨ឆ្នាំ របួសស្រាល អ្នកទាំងបីរស់នៅភូមិតាំងរបង ឃុំហោសំណម ស្រុកឱរ៉ាល់ ៨-នីម ងីន ភេទស្រី អាយុ១៩ឆ្នាំ របួសស្រាល រស់នៅឃុំក្រាំងតារ៉ាវ និងទី៩-ឈ្មោះ ជួន ហឿន ភេទប្រុស អាយុ៥៣ឆ្នាំ របួសស្រាល ជាអ្នកបើកបរ រស់នៅភូមិតាំងរបង ឃុំហោសំណម ស្រុកឱរ៉ាល់។
សមត្ថកិច្ចបន្តថា ជនរងគ្រោះត្រូវបានដឹងបញ្ជូនទៅកាន់មន្ទីរពេទ្យភ្លាមៗផងដែរ ចំណែករថយន្តរងការខូចខាតយ៉ាងដំណំនិងក្រឡាប់ផ្ងាជើងចំកណ្កាលថ្នល់ បង្កឲ្យកកស្ទះចរាចរណ៍ផងដែរសម្រាប់អ្នកដំណើរឆ្លងកាត់៕
ដោយ៖ សុខ ខេមរា
