ភ្នំពេញ ៖ នាល្ងាចថ្ងៃទី ១៣ ខែ កញ្ញា ឆ្នាំ ២០២៣នេះ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិកឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្រ្តី និងកុមារ, ក្រុមការងារអគារផ្កាម្លិះគាំទ្រចិត្តសាស្ត្រសង្គមសាខាកាកបាទក្រហមកម្ពុជា រាជធានីភ្នំពេញ ដឹកនាំដោយ លោកស្រី ហង្ស ណាវី ប្រធានការិយាល័យសុខភាព និងជានាយិកាអគារផ្កាម្លិះ ព្រមទាំងមានការអញ្ជេីញចូលរួមពីលោក ញុិល លាង អនុប្រធានគណៈកម្មាធិការអនុសាខាខណ្ឌទួលគោក បានចុះអប់រំផ្សព្វផ្សាយពីសុខភាពមាតា ទារក និងកុមារ ជូនដល់ស្ត្រីមានផ្ទៃពោះ និងស្ត្រីមានកូនតូច ចំនួន៣៥នាក់ រស់នៅសង្កាត់បឹងកក់ទី២ ខណ្ឌទួលគោក ។
គោលបំណងនៃការចុះអប់រំផ្សព្វផ្សាយជូនដល់ស្ត្រីមានផ្ទៃពោះនេះ គឺដេីម្បីលេីកកម្ពស់សុខភាពស្ត្រី និងកុមារ នៅក្នុងសហគមន៍ សំដៅកាត់បន្ថយអត្រាគ្រោះថ្នាក់ និងមរណភាពរបស់មាតា ទារក ក្នុងអំឡុងពេលពពោះ និងសម្រាល ។
ក្រុមការងារបានលេីកយកប្រធានបទសំខាន់ៗមកបង្ហាញរួមមាន៖
១. ការថែរក្សាសុខភាពសម្រាប់ស្ត្រីពេលមានផ្ទៃពោះ
២. ប្រការត្រូវជៀសវាងសម្រាប់ស្រ្តីមានផ្ទៃពោះ
៣. ប្រភេទអាហារដែលល្អសម្រាប់ស្ត្រីមានផ្ទៃពោះ
៤. សារៈសំខាន់នៃទឹកដោះដំបូងសម្រាប់ទារកទើបនឹងកើត
៥. របៀបរៀបចំអាហារបន្ថែមសម្រាប់កុមារតូចៗពីអាយុ ៦ខែ ទៅ ១២ខែ ។
ក្រៅពីប្រធានបទខាងលេី ក្រុមការងារក៏បានចែករំលែកអំពីជំងឺមហារីកមាត់ស្បូន និងជំងឺមហារីកសុដន់ ក្នុងគោលបំណងដូចខាងក្រោម៖
១.បង្កើនសមត្ថភាព និងការយល់ដឹងរបស់បងប្អូនប្រជាពលរដ្ឋ ជាពិសេសស្ត្រី អំពីជំងឺមហារីកមាត់ស្បូន និងជំងឺមហារីកសុដន់ និងផលប៉ះពាល់ដែលបណ្តាលមកពីជំងឺនេះ ដើម្បីបន្តអប់រំផ្សព្វផ្សាយដល់ស្រ្តីដែលមានអាយុចន្លោះពី ៣០-៤៩ឆ្នាំ ទៅពិនិត្យនិងព្យាបាលជំងឺមហារីកមាត់ស្បូន និងជំងឺមហារីកសុដន់។
២. ដើម្បីចូលរួមជាមួយរាជរដ្ឋាភិបាល ក្នុងការកាត់បន្ថយអត្រាមរណភាពមាតា ស្រ្តី ទៅនឹងបញ្ហា ប្រឈមនៃជំងឺមហារីកមាត់ស្បូន និងជំងឺមហារីកសុដន់ ដែលកំពុងតែកើនឡើងនៅក្នុងប្រទេសកម្ពុជា។
៣. ឆ្លុះបញ្ចាំងពីការប្តេជ្ញាចិត្តរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងការរួមចំណែកកាត់ បន្ថយអត្រាមរណៈរបស់មាតា និងស្រ្តី ឱ្យធ្លាក់ចុះទាបកម្រិតអប្បរមាបំផុត តាមរយៈការអប់រំផ្សព្វផ្សាយតាមសហគមន៍ឱ្យយកចិត្តទុកដាក់គាំពារដល់សុខភាពស្រ្តីជាមាតា និងសុខភាពបន្តពូជរបស់យុវវ័យ រួមទាំងការទៅពិនិត្យនិងព្យាបាលជំងឺមហារីកមាត់ស្បូន និងជំងឺមហារីកសុដន់ឱ្យបានទាន់ពេលវេលា។
៤. ផ្សព្វផ្សាយជូនបងប្អូនជនរួមជាតិ ពីវិធីសាស្រ្តជំនាញមានវិជ្ជាជីវៈក្នុងការពង្រឹងសេវាសុខភាពបន្តពូជ សុខភាពមាតា ទារក កុមារ យុវវ័យ អាហារូបត្ថម្ភ ដើម្បីសុខុមាលភាពរបស់ប្រជាជន ៕
ដោយ : សហការី
