ភ្នំពេញ៖ បុរសម្នាក់បានបាក់កស្លាប់ភ្លាមៗនៅកន្លែងកើតហេតុ និងបីនាក់ទៀតរងរបួសយ៉ាងធ្ងន់ ត្រូវបានរថយន្ដសង្គ្រោះបន្ទាន់ដឹកយកទៅសង្គ្រោះនៅមន្ទីរពេទ្យ ដោយសារតែពួកគេជិះម៉ូតូពីរគ្រឿងក្នុងទិសដៅបញ្ច្រាសទិសគ្នាហើយបុកគ្នាចំពីមុខពេញទំហឹង កាលពីវេលាម៉ោង២១និង៣០នាទីយប់ថ្ងៃទី ០១ ខែកក្កដា ឆ្នាំ២០១៦ នៅចំណុចខាងមុខច្រកចូលផ្ទះសំណាក់ មានលាភ តាមបណ្ដោយផ្លូវជាតិលេខ៥ ស្ថិតក្នុងសង្កាត់ ស្វាយប៉ាក ខណ្ឌឬស្សីកែវ រាជធានីភ្នំពេញ។

ជនរងគ្រោះដែលបាត់បង់ជីវិត្តមានឈ្មោះ បូរ៉ា ភេទប្រុស អាយុ២៦ មានទីលំនៅ នៅភូមិ គ្រួស សង្កាត់ព្រែភ្នៅ ខណ្ឌព្រែភ្នៅ និងម្នាក់ទៀតឈ្មោះ ឆន សុភា អាយុ២៦ឆ្នាំ មានលំនៅ នៅភូមិជាមួយគ្នា។ ចំណែកពីរនាក់ទៀតនៅមិនទាន់ស្គាល់អត្តសញ្ញាណនៅទេ។

ប្រភពព័ត៌មានពីកន្លែងកើតហេតុបានអោយដឹងថានៅមុនពេលកើតហេតុ គេបានឃើញម៉ូតូម៉ាក សង់កូរ៉េ ពណ៍ប្រផេះលាយលឿង ពាក់ស្លាកលេខ ញ-0586 ភព1 ជិះគ្នាពីរនាក់ ធ្វើដំណើរតាមបណ្ដោយផ្លូវជាតិលេខ៥ ទិសដៅពីជើងទៅត្បូង ពេលមកដល់ចំណុចកើតហេតុមានម៉ូតូមួយគ្រឿងទៀតម៉ាកTAURUS ពណ៍ខ្មៅ គានស្លាកលេខ ជិះគ្នាពីរនាក់ដូចគ្នា ធ្វើដំណើរបញ្ញ្រាសទិសគ្នាក៏ជ្រុលបុកគ្នាយ៉ាងពេញទំហឹង បណ្ដាលអោយបុរសម្នាក់ដែលជាអ្នកបើកម៉ូតូសង់កូរ៉េ បាក់កស្លាប់ភ្លាមៗ ចំណែកបីនាក់ទៀតរងរបួសធ្ងន់។

ក្រោយពីកើតហេតុអ្នករងរបួសត្រូវបានរថយន្ដសង្គ្រោះដឹកយកទៅសង្គ្រោះនៅមន្ទីរពេទ្យ រីឯសពជនរងគ្រោះសមត្ថកិច្ចបានទំនាក់ទំនងទៅក្រុមគ្រួសារយកទៅធ្វើបុណ្យតាមប្រពៃណី ចំណែកម៉ូតូទាំងពីរគ្រឿងកម្លាំងជំនាញធ្វើការវាស់វែងយកទៅរក្សាទុកនៅការិយាល័យចរាចរណ៍ រាជធានីភ្នំពេញ ដើម្បីដោះស្រាយតាមនិតិវិធីច្បាប់៕

ដោយ៖ ព្រែកជ័យ