ខេត្តបន្ទាយមានជ័យៈ អាជ្ញាធរខេត្ត ចុះពិនិត្យមើលទីតាំងស្តុក និងចែកចាយសត្វមាន់ ស្រុកម៉ាឡៃ
នៅថ្ងៃទី២៦ ខែកញ្ញា ឆ្នាំ២០២៣ លោក ឃ្លោក នួយ អភិបាលរងខេត្ត លោក ឈុន ប៊ុនថា នាយកទីចាត់អន្តរវិស័យ លោក ហ៊ុយ ទូច ប្រធានការិយាល័យផលិតកម្ម និងបសុព្យាបាល នៃមន្ទីកសិកម្ម រុក្ខាប្រមាញ់ និងនេសាទខេត្ត ចុះពិនិត្យមើលទីតាំងស្តុក និងចែកចាយសត្វមាន់ នៅភូមិថ្មី ឃុំអូរស្រឡៅ ស្រុកម៉ាឡៃ ។
ក្នុងការចុះទីតាំងខាងលើ ដើម្បីពិនិត្យទៅតាមច្បាប់អនុញ្ញាតនៃការនាំចូលសត្វមាន់រស់ពីប្រទេសថៃចូលមកកម្ពុជា ដើម្បីចែកចាយក្នុងទីផ្សានៅក្នុងប្រទេសកម្ពុជា។
យោងអនុសាសន៍ឯកឧត្តម អ៊ុំ រាត្រី អភិបាលនៃគណៈអភិបាលខេត្ត លោក ឃ្លោក នួយ អភិបាលរងខេត្ត ក៏បានធ្វើការណែនាំដល់ម្ចាស់ទីតាំងដែលស្តុកសត្វមាន់ដើម្បីចែកចាយបន្តទៅតាមបណ្តារ ត្រូវសម្អាតអនាម័យទីតាំងឱ្យបានល្អ កុំឱ្យមានជះក្លិនស្អុយ និងធ្វើការសម្អាតបរិស្ថានជុំវិញឱ្យបានល្អ។
បើតាមការបញ្ជាក់ពីមន្ត្រីបសុពេទ្យដែលប្រចាំការនៅទីនោះបានប្រាប់ឱ្យដឹងថា ៖ ទីតាំងស្តុកចែកចាយមាន់ខាងលើ មុនការនាំចូលសត្វមាន់មកកាន់ទីផ្សាកម្ពុជា ឆ្លងកាត់ការពិនិត្យសុខភាពសត្វយ៉ាងម៉តចត់ពីប្រទេសថៃមុនអនុញ្ញាតឱ្យនាំចូល។ មន្ត្រីដ៏ដែលបញ្ជាក់ថា ទីតាំងខាងលើមានក្រុមហ៊ុនចំនួន៣ដែលមានច្បាប់អនុញ្ញាតត្រឹមត្រូវ(ច្បាប់ចេញពីអគ្គនាយកដ្ឋាន) ដើម្បីនាំចូលសត្វមាន់ចែកចាយបន្តទីតាមបណ្តាខេត្តផ្សេងៗ។ ដោយក្រុមហ៊ុនទាំង៣មាន ១-ក្រុមហ៊ុន កូ ឡែន (២ច្បាប់), ២-ក្រុមហ៊ុនគន្ធារស្មីពេជ្យ(២ច្បាប់), ៣-ក្រុមហ៊ុនហ្វាញ គ្រុប (២ច្បាប់) ដោយក្នុងមួយច្បាប់អនុញ្ញាតដឹកបានត្រឹមតែសត្វមាន់២០០០ក្បាលប៉ុណ្ណោះ។ ក្នុងមួយថ្ងៃក្រុមហ៊ុននីមួយៗចេញចំនួន២ច្បាប់ ដឹកសត្វមាន់ចន្លោះពី៣០០០ ទៅ៤០០០ក្បាល៕
ដោយ៖វណ្ណា
