ភ្នំពេញ ៖ កម្លាំងនគរបាលប៉ុស្តិ៍បឹងកក់ទី២ បានធ្វើការស្រាវជ្រាវនិងល្បាតក្នុងមូលដ្ឋានរបស់ខ្លួនរហូតឈានទៅដល់ការឃាត់ខ្លួនជនសង្ស័យម្នាក់ដែលជាអ្នកលក់គ្រឿងញៀននៅប្លុករោងចក្រឆ្នាំង ផ្លូវរថភ្លើង ក្រុម១០៦ ភូមិ ២៣ សង្កាត់បឹងកក់២ ខណ្ឌទួលគោក នៅវេលាម៉ោង១០និង៤០នាទីព្រឹកថ្ងៃទី៤ ខែកក្ដដា ឆ្នាំ២០១៦ ។

ជនសង្ស័យឈ្មោះ កាន់ វុនហេង ហៅយក្ស ភេទប្រុស អាយុ៣៣ឆ្នាំ ជនជាតិខ្មែរ មុខរបររត់ម៉ូតូឌុប ស្នាក់នៅផ្ទះជួល ផ្លូវលំ សង្កាត់បឹងទំពុន ខណ្ឌមានជ័យ រាជធានីភ្នំពេញ។

តាមប្រភពពីមន្រ្តីនគរបាលប៉ុស្តិ៍បឹងកក់ទី២បានឲ្យដឹងថា នៅមុនពេលឃាត់ខ្លួនបុរសសង្ស័យខាងលើនេះគេបានឃើញរូបគេកំពុងតែឈរ ធ្វើសកម្មភាពចែកចាយគ្រឿងញៀន នៅលើផ្លូវរថភ្លើង ពេលនោះកម្លាំងរបស់លោកកំពុងតែល្បាតក្នុងមូលដ្ឋានមានការសង្ស័យក៏ឃាត់ខ្លួនសួរនាំនិងរកឃើញគ្រឿងញៀនប្រភេទម៉ាកទឹកកកមួយកញ្ចប់ធំក៏ឃាត់ខ្លួនភ្លាមៗតែម្តង។

បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌទួលគោកដើម្បីសាកសួរនិងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី ៕

ដោយ៖ ស ដារ៉ា