ខេត្តស្វាយរៀង៖ ក្រុងស្វាយរៀងសង្កាត់ចេក និងស្រុកកំពង់រោទ៍ ឃុំញរ ទទួលរង្វាន់ជ័យលាភី  ភូមិ ឃុំ សង្កាត់ មានសុវត្ថិភាព (មានអនាម័យ មានសោភ័ណភាពល្អ និងមានបរិស្ថានល្អ )ពីក្រសួងបរិស្ថាន។

ជាក់ស្ដែងនាសៀលថ្ងៃទី២៦ ខែតុលា ឆ្នាំ២០២៣ ដឹកនាំដោយលោកសេងសីលា អភិបាលរងខេត្តតំណាងលោកអភិបាលខេត្តស្វាយរៀង លោកណុបចំរើន អភិបាលក្រុងស្វាយរៀងនិងលោកស៊ុចពិសី អភិបាលស្រុកកំពង់រោទិ៍ បានទទួលរង្វាន់ជ័យលាភី  ភូមិ ឃុំ សង្កាត់ មានសុវត្ថិភាព មានអនាម័យ មានសោភ័ណភាពល្អ និងមានបរិស្ថានល្អ នៅទីស្ដីការក្រសួងបរិស្ថាន ក្រោមអធិបតីភាព លោក បណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ។

ក្នុងឱកាសនោះលោក រដ្ឋមន្ត្រីក្រសួងបរិស្ថាន បានមានប្រសាសន៍ថា ក្នុងរយៈពេលជាង១ខែ សិស្សានុសិស្ស និងលោកគ្រូអ្នកគ្រូប្រមាណចំនួន១,៨លាននាក់ បានចូលរួមអនុវត្ត «ថ្ងៃនេះ ខ្ញុំមិនប្រើថង់ប្លាស្ទិកទេ» មិនត្រឹមតែសិស្សានុសិស្សនៅតាមសាលារៀននោះទេ កម្មករកម្មការិនីនៅតាមរោងចក្រ សហគ្រាសនានា ព្រមជាមួយគ្នានេះ ព្រះសង្ឃ នៅតាមវត្តអារាមនានា បានចូលរួមអនុវត្តវិធានការ«ថ្ងៃនេះ ខ្ញុំមិនប្រើថង់
ប្លាឲស្ទិកទេ»។

លោកបានបញ្ជាក់បន្ថែមថា កាលណាយើងស្អាត ភូមិយើងស្អាត ស្រុកយើងស្អាត ប្រទេសយើងក៏ស្រស់ស្អាត មានសោភ័ណភាព នឹងមានការទាក់ទាញភ្ញៀវទេសចរណ៍ អ្នកវិនិយោគមកប្រទេសកម្ពុជាយ៉ាងពិតប្រាកដ។

ជាមោទនភាព សម្រាប់ឃុំសង្កាត់ទាំងពីរ ដែលអាចជាប់ចំណាត់ថ្នាក់ រហូតទទួលបានជ័យលាភី ក្នុងចំណោមឃុំសង្កាត់ចំនួន ៨០ នៅខេត្តស្វាយរៀង លទ្ធផលនេះមិនបានមកដោយឯកឯងនោះទេ គឺដោយសារ ការខិតខំណែនាំ ចង្អុលបង្ហាញ របស់រដ្ឋបាលស្រុកកំពង់រោទិ៍ និងរដ្ឋបាលក្រុងស្វាយរៀង ដែលនាំមកនូវការសម្រេចបានរហូតមកដល់សព្វថ្ងៃនេះ ជាងពិសេសមានការចូលរួមពីមន្ត្រីរាជការ កងកម្លាំងក្នុងស្រុក សិស្សានុសិស្ស គ្រូបង្រៀន និងប្រជាពលរដ្ឋបានចូលរួមយ៉ាងសកម្មផងដែរ ក៏ដូចជារដ្ឋបាលក្រុងស្រុកដទៃទៀត ក្នុងចំណោម ២៥ រាជធានី ខេត្ត៕ ដោយ៖សុថាន