ភ្នំពេញ​ ៖​ យោងតាមរបាយការណ៍របស់មន្ត្រីជំនាញ​ នៃអធិការដ្ឋាននគរបាលខណ្ឌដង្កោ​ បានឱ្យដឹងនារសៀលថ្ងៃទី០២​ ខែវិច្ឆិកា​ ឆ្នាំ​២០២៣នេះ​ មានករណីលួចមានស្ថានទម្ងន់ទោសដោយការប្រព្រឹត្តអំពើហិង្សា(វ៉ៃនិងប្រើដែកទួណឺវ៉ីសចាក់ក)បង្កឡេីងកាលពីថ្ងៃទី០១ ខែវិច្ឆិកាឆ្នាំ២០២៣ វេលាម៉ោង១៦ និង១០នាទី ត្រង់ចំណុចបុរីហេងឃាង ផ្ទះលេខA២ ផ្លូវបេតុង  ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។

សមត្ថកិច្ចបានឱ្យដឹងថា​ ជនរងគ្រោះឈ្មោះ តាំង ឈុនបួយ ភេទស្រី អាយុ២៩ឆ្នាំ មុខរបរលក់ដូរ ស្នាក់នៅផ្ទះលេខA២ ផ្លូវបេតុង  ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។ ចំណែកជនសង្ស័យម្នាក់ដែលឃាត់ខ្លួនមានឈ្មោះ គឹម ម៉រ៉ាឌី  ភេទប្រុស អាយុ៣៣ឆ្នាំ មុខរបរមិនពិតប្រាកដ ស្នាក់នៅការដ្ឋានសំណង់ហេងឃាង ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
ចំណែកសម្ភារៈបន្សល់ទុក: ១/ ទូរស័ព្ទដៃម៉ាក iphone ១៤ ចំនួន០១គ្រឿង, ២/ផ្លែទួណឺវ៉ីសចំនួន០១,៣/ដែកសម្រាប់ឆ្កឹះសោរចំនួន០២,៤/កន្ត្រៃកាត់ក្រចកចំនួន០១។
គួរបញ្ជាក់ថា​ ៖ កាលពីថ្ងៃទី០១ ខែវិច្ឆិកា ឆ្នាំ២០២៣ វេលាម៉ោង១៦និង១០នាទី ជនរងគ្រោះឈ្មោះ តាំង ឈុនបួយ​ ភេទស្រី អាយុ ២៩ ឆ្នាំកំពុងសម្រាកនៅក្នុងបន្ទប់ជាន់ទី២ ផ្ទះលេខA២  ផ្លូវបេតុង ភូមិសំបួរ សង្កាត់ដង្កោ ខណ្ឌដង្កោរាជធានីភ្នំពេញ បានសាកថ្មទូរស័ព្ទដៃ០១គ្រឿងម៉ាក់ iphone ១៤ ពណ៌ខ្មៅ លើក្បាលដំណេកខាងឆ្វេងហើយជនរងគ្រោះក៏ដេកលក់ទៅ ។ បន្ទាប់មកជនសង្ស័យឈ្មោះ គឹម ម៉ារ៉ាឌី ភេទប្រុស អាយុ ៣៣ឆ្នាំ ជាកម្មករសំណង់ជួសជុលផ្ទះក្បែរផ្ទះជនរងគ្រោះបានឃើញទ្វារដំបូលចំហទ្វារ ជនសង្ស័យក៏បានលួចចូលទៅខាងក្នុងផ្ទះ ហើយឃើញជនរងគ្រោះ ដេកលក់នៅក្នុងបន្ទប់ រួចដាក់សាកថ្មទូរស័ព្ទដៃ០១គ្រឿងម៉ាក iphone ១៤ ពណ៌ខ្មៅ ក្បាលដំណេកខាងឆ្វេង បន្ទាប់មកជនសង្ស័យក៏បានចូលក្នុងបន្ទប់ជនរងគ្រោះរួចធ្វើសកម្មភាពលួចទូរសព្ទដៃម៉ាកខាងលើ ស្រាប់តែជនរងគ្រោះភ្ញាក់ដឹងខ្លួនឃើញជនសង្ស័យកំពុងធ្វើសកម្ម ភាពលួចទូរសព្ទដៃរបស់ខ្លួនក៏បានស្រែកឆោឡោឲ្យអ្នកជិតខាងជួយ ហើយជនសង្ស័យឃើញជនរងគ្រោះស្រែកឆោឡោក៏បានយកដែកផ្លែទួណឺវ៉ីសចាក់កនិងវ៉ៃជនរងគ្រោះ ស្របពេលកម្លាំងសមត្ថកិច្ចប៉ុស្តិ៍នគរបាលរដ្ឋបាលដង្កោកំពុងជិះម៉ូតូល្បាតក្នុងមូលដ្ឋានក្បែរកន្លែងកើតហេតុបានឮជនរងគ្រោះស្រែកឲ្យជួយ ហើយសមត្ថកិច្ចក៏បានជួយអន្តរាគមន៍ឃាត់ខ្លួនជនសង្ស័យខាងលើរួមនិងវត្ថុតាង១/ទូរស័ព្ទដៃម៉ាកiphone១៤ចំនួន០១គ្រឿង,២/ផ្លែទួណឺវ៉ីសចំនួន០១,៣/ដែកសម្រាប់ឆ្កឹះសោរចំនួន០២,៤/កន្ត្រៃកាត់ក្រចកចំនួន ០១ យកមកប៉ុស្តិ៍នគរបាលរដ្ឋបាលដង្កោធ្វើការសាកសួរតាមនីតិវិធីច្បាប់។
​ ក្រោយពីធ្វើការសាកសួរជនសង្ស័យបានឆ្លើយសារភាពប្រាប់សមត្ថកិច្ចថា រូបគេ (ជនសង្ស័យ) ពិតជាបានធ្វើសកម្មភាពចូលក្នុងផ្ទះ លួចយកទូរស័ព្ទដៃរបស់ជនរងគ្រោះប្រាកដមែន រួចជនរងគ្រោះក៏បានមកដាក់ពាក្យបណ្តឹងចំឈ្មោះជនសង្ស័យ ដើម្បីឱ្យសមត្ថកិច្ចចាត់ការតាមផ្លូវច្បាប់តែម្តង​ ។ ដោយឡែកវត្ថុតាង​ សមត្ថកិច្ចក៏បានប្រគល់ឱ្យជនរងគ្រោះវិញផងដែរ ៕​ ដោយ​ ៖​ ភារ៉ា​ ដង្កោ