ណៃពិដោ៖ ទីភ្នាក់ងារមួយ របស់អង្គការសហប្រជាជាតិបានឱ្យដឹងថា ទូក៣គ្រឿងដែលពោរពេញទៅដោយជនភៀសខ្លួនរ៉ូហ៊ីងយ៉ាជាង ៥០០នាក់ បានចូលចតនៅខេត្តភាគខាងលិចបំផុត របស់ប្រទេសឥណ្ឌូណេស៉ី កាលពីថ្ងៃអាទិត្យចុងសប្តាហ៍កន្លងទៅនេះ ដែលនេះជាចំនួនច្រើនបំផុតមួយចាប់តាំងពី យោធានៃរបបសឹកមីយ៉ាន់ម៉ាបើកការបង្ក្រាបលើក្រុមជនជាតិភាគតិចមួយនេះក្នុងឆ្នាំ២០១៧។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃចន្ទ ទី២០ ខែវិច្ឆិកា ឆ្នាំ២០២៣។
មន្ត្រីការពារជនភៀសខ្លួន របស់អង្គការសហប្រជាជាតិ លោក Faisal Rahman បានប្រាប់ AFP ថា ទូកមួយគ្រឿងបានមកដល់ស្រុក Bireuen នៃខេត្ត Aceh ដោយមានមនុស្សចំនួន ២៥៦នាក់នៅលើនោះ ខណៈដែល ២៤១នាក់ផ្សេងទៀត បានមកដល់តំបន់ Pidie ហើយទូកតូចមួយ ដែលផ្ទុកមនុស្សចំនួន ៣៦នាក់បានទៅដល់ភាគខាងកើតនៃខេត្ត Aceh។ អ្នកកាសែតមួយរូបរបស់ AFP ដែលបានឃើញទូកជនជាតិរ៉ូហ៉ីងយ៉ាចូលចតនៅលើឆ្នេរខ្សាច់ ក្នុងទីក្រុង Bireuen និយាយថា ជនភៀសខ្លួនទាំងនោះកំពុងត្រូវបានប្រមូលផ្តុំឱ្យនៅទីជម្រកបណ្តោះអាសន្នមួយ ដើម្បីរង់ចាំការសម្រេចចិត្តពីអាជ្ញាធរ លើជោគវាសនារបស់ពួកគេ ដែលភាគច្រើនមានសុខភាពល្អ។
គួរបញ្ជាក់ថា ជនជាតិរ៉ូហ៉ីងយ៉ាភាគច្រើន ត្រូវបានគេធ្វើទុក្ខបុកម្នេញក្នុងប្រទេសមីយ៉ាន់ម៉ា ហើយជារៀងរាល់ឆ្នាំមានមនុស្សរាប់ពាន់នាក់ប្រថុយជីវិត ក្នុងការធ្វើដំណើរតាមសមុទ្រ និងជាញឹកញាប់ជិះទូកចាស់ៗ ដើម្បីព្យាយាមទៅដល់ម៉ាឡេស៉ី ឬឥណ្ឌូណេស៉ី៕ ដោយធីរីណា
រូបថត: Reuters
