រថយន្តដឹកទំនិញរបស់ចិនប្រហែល 120 គ្រឿងត្រូវបានដុតបំផ្លាញនៅច្រកព្រំដែន Kyinsankyawt ជាប់ព្រំដែននៃប្រទេសមីយ៉ាន់ម៉ា និងប្រទេសចិន ដែលសង្ស័យថាជាសកម្មភាពរបស់ជនជាតិភាគតិច។

កាលពីថ្ងៃទី២៤ ខែវិច្ឆិកា សារព័ត៌មាន Global New Light of Myanmar បានផ្សាយថា ក្បួនរថយន្តដឹកទំនិញពីប្រទេសចិនទៅកាន់មីយ៉ាន់ម៉ាត្រូវបានវាយប្រហារដោយក្រុមជនជាតិភាគតិច ហើយបានឆាបឆេះនៅក្នុងរដ្ឋ Shan (ភាគខាងជើងមីយ៉ាន់ម៉ា)។
យោងតាម Global New Light of Myanmar ក្រុមជនជាតិភាគតិចដែលបានធ្វើការវាយប្រហារនោះរួមមាន កងទ័ពសម្ព័ន្ធភាពប្រជាធិបតេយ្យជាតិមីយ៉ាន់ម៉ា (MNDAA) កងទ័ពរំដោះជាតិ Ta’ang (TNLA) និងកងកម្លាំងស្វ័យការពារប្រជាជន (PDF)។
ក្រុមទាំងនេះបានប្រើប្រាស់យានជំនិះគ្មានមនុស្សបើក (UAVs) ដើម្បីទម្លាក់គ្រាប់បែកលើចំណតរថយន្តរបស់ក្រុមហ៊ុន Seven Huaqin Import Company នៅច្រកព្រំដែន Kyinsankyawt ជាប់ព្រំដែនមីយ៉ាន់ម៉ា និងចិន នៅវេលាម៉ោង ៩៖៤៥នាទីព្រឹក ថ្ងៃទី២៣ ខែវិច្ឆិកា (ម៉ោងក្នុងស្រុក)។
អគ្គិភ័យនេះកើតឡើងដោយសារគ្រាប់បែកធ្លាក់លើរថយន្តដែលចតក្នុងចំណតរថយន្ត រាលដាលពីរថយន្តមួយទៅរថយន្តមួយទៀត។ កម្លាំងសង្គ្រោះ និងសន្តិសុខបានធ្វើការពន្លត់ភ្លើង និងអនុវត្តប្រតិបត្តិការជួយសង្គ្រោះចាំបាច់។
“ដោយសារតែអំពើភេរវកម្មនេះ រថយន្តប្រហែល 120 ក្នុងចំណោម 258 គ្រឿងដែលផ្ទុកទំនិញក្នុងផ្ទះ ទំនិញប្រើប្រាស់ សម្លៀកបំពាក់ និងសម្ភារៈសំណង់ត្រូវបានដុតបំផ្លាញ” – យោងតាម Global New Light of Myanmar ៕

រូប​ថត​:plo.vn