ភ្នំពេញ ៖ បុរសជនបរទេសបើករថយន្ត ក្នុងល្បឿនយ៉ាងលឿនជ្រុលចង្កូតទៅបុកទម្លុះបារ៉ាស បណ្ដាលឲ្យរថយន្តដាំក្បាលធ្លាក់ចូលទៅក្នុងរណ្ដៅការដ្ឋាន ដែលទើបនឹងសាងសង់ថ្មីក្នុងបរិវេណកោះនរា។

ហេតុការណ៍គ្រោះថ្នាក់ចរាចរណ៍នេះ បង្កឲ្យមានការភ្ញាក់ផ្អើលកាលពីម៉ោង ១២និង ៥០នាទីរំលងអធ្រាត្រឈានចូលថ្ងៃទី៣០ខែធ្នូឆ្នាំ២០២៣ ចំណុចក្នុងបរិវេណកោះនរា ក្នុងសង្កាត់និរោធ ខណ្ឌច្បារអំពៅ។

ប្រភពព័ត៌មានពីសន្តិសុខប្រចាំការ នៅក្នុងគោលដៅទីតាំងកន្លែងកើតហេតុបានឲ្យដឹងថា មុនពេលកើតហេតុដោយឃើញបុរសជនបរទេសម្នាក់ បានបើករថយន្តម៉ាក
RANGROVER ពណ៌ខ្មៅពាក់ស្លាកលេខ កម្ពុជា TEVY.005 ធ្វើដំណើរចេញពីផ្លូវជាតិលេខ១ រួចកាត់តាមបណ្តោយផ្លូវទៅស្ពានកោះនរា ក្នុងទិសដៅពីត្បូងមកជើង ខណៈបើកមកដល់ចំនុចកើតហេតុ សង្ស័យតែច្រឡំផ្លូវក៏ជ្រុលទៅបុកទម្លុះបារ៉ាស់ ធ្លាក់ដាំក្បាលរថយន្តចូលក្នុងរណ្តៅដីការដ្ឋាន ដែលទើបនឹងសាងសង់ សំណាងល្អមិនបង្កឲ្យមានគ្រោះថ្នាក់ដល់អ្នកដទៃ។

បន្ទាប់ពីកើតហេតសន្តិសុខប្រចាំការ ក្នុងបរិវេណគោលដៅតំបន់កោះនរា ពិនិត្យទៅមិនឃើញប៉ះពាល់ទៅលើអ្នកដ៏ទៃ និងមិនប៉ះពាល់ទៅលើទ្រព្យសម្បត្តិក្នុងការដ្ឋាន ក៏ឲ្យបុរសជនបរទេសហៅរថយន្តស្ទូចយកទៅជួសជុលដោយខ្លួនឯង៕ជ្រោយពេជ្រ