ភ្នំពេញ៖ បុរសម្នាក់បើករថយន្ដមួយគ្រឿងម៉ាក កាមរីហាយប្រ៊ីតក្នុងល្បឿនលឿនហើយបាន ជ្រុលបុកម៉ូតូមួយគ្រឿងម៉ាកវីវ៉ាពីក្រោយពេញទំហឹងបណ្ដាលឲ្យបុរសម្នាក់រងរបួសបាក់ជើងខាងឆ្វេង និងម្នាក់ទៀតរងរបួសស្រាល បន្ទាប់ពីជួបគ្រោះថ្នាក់រួចអ្នកដែលរងរបួសស្រាលបានលើកម៉ូតូ ជិះគេចខ្លួនបាត់ស្រមោលដោយទុកមិត្តភក្តិចោលនៅកន្លែងកើហេតុ ចំណែកអ្នកបើករថយន្ដក៏បានបើគេចបានប្រហែល៣០០ម៉ែត្រទើបម្ចាស់ឈប់ចុះពីលើរថយន្ដគេចខ្លួនបាត់ស្រមោលផងដែរ។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១ និង៤៥រំលងអាធ្រាត្រ ឈានចូលថ្ងៃទី១២ ខែកក្កដា ឆ្នាំ២០១៦ នៅចំណុចផ្លូវលេខ២១៤កែងនឹងមហាវិថីព្រះនរោត្ដម ស្ថិតក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញបុរស២នាក់ជិះម៉ូតូមួយគ្រឿងម៉ាកវីវ៉ា ពណ៌ខ្មៅ មិនចាំស្លាកលេខ ដោយធ្វើដំណើរតាមបណ្ដោយមហាវិថីព្រះនរោត្តមទិសដៅពីជើងទៅត្បូងពេលមកដល់ចំណុចកើតហេតុក៏ត្រូវរថយន្ដមួយគ្រឿងម៉ាកកាមរីហាយប្រ៊ីត ពណ៌ទឹកប្រាក់ ពាក់ស្លាកលេខ ភ្នំពេញ2R-3383 ដែលធ្វើដំណើរស្របទិសគ្នាបានមកបុកពីក្រោយពេញទំហឹងបណ្ដាលឲ្យបុរសម្នាក់រងរបួសបាក់ជើងខាងឆ្វេងនិងម្នាក់ទៀតរងរបួសស្រាល។

ប្រភពដដែលបានបន្តថាក្រោយពីកើតហេតុរថយន្ដបង្កបានបើករត់គេចមកដល់ផ្លូវលេខ២២៨ កែងមហាវិថីព្រះនរោត្តមទើបម្ចាស់រថយន្ដឈប់ហើយគេចខ្លួនបាត់ដោយទុករថយន្ដចោល។ ចំណែកជនរងគ្រោះម្នាក់ដែលរងរបួសស្រាលបានលើកម៉ូតូជិះគេចខ្លួនបាត់ដោយទុកមិត្តរបស់ខ្លួនដែលរងរបួសធ្ងន់នៅកន្លែងកើតហេតុ។

ក្រោយមកជនរងគ្រោះដែលរងរបួសធ្ងន់ត្រូវបានរថយន្ដសង្គ្រោះបន្ទាន់ដឹកយកទៅសង្គ្រោះនៅមន្ទីរពេទ្យ រីឯរថយន្ដបង្កសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីដោះស្រាយតាមនីតិវិធីច្បាប់៕

ដោយ៖ ព្រែកជ័យ