ខេត្តស្វាយរៀង: មានករណីគ្រោះថ្នាក់ចរាចរណ៍គួរអោយរន្ធត់មួយបានកើតឡើង ដោយប្ដីបានស្លាប់ រីឯប្រពន្ធរបួសធ្ងន់ដោយត្រូវរថយន្តមិនស្គាល់ម៉ាកបើកបុកម៉ូតដែលបើកបញ្ច្រាសទិសគ្នានៅស្រុករមាសហែក។
ហេតុការណ៍នេះបានកើតឡើងកាលពីវេលារសៀលម៉ោង៤និង៥០នាទី ព្រឹកថ្ងៃទី៦ ខែមករា ឆ្នាំ២០២៤ នៅលើផ្លូវខេត្តក្រាលក្រួសក្រហម ត្រង់ចំណុចភូមិប្រាសាទ ឃុំសំបួរ ស្រុករមាសហែក ខេត្តស្វាយរៀង។
យោងតាមសមត្ថកិច្ចនគរបាលបានអោយដឹងថា បុរសដែលស្លាប់មានឈ្មោះ ហ៊ុន ប៊ន អាយុ៥៤ឆ្នាំ មុខរបរកសិករ និងប្រពន្ធរងរបួសធ្ងន់មានឈ្មោះ
ឈុន ថា អាយុ៥២ឆ្នាំ មុខរបរកសិករ
រស់នៅភូមិម្រាមខាងជើង ឃុំម្រាម ស្រុករមាសហែក ខេត្តស្វាយរៀង បើកម៉ូតូម៉ាក ហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០២០ ពាក់ស្លាកលេខ ស្វាយរៀង១P-៦២០០ ខូចខាតទាំងស្រុង។
តាមចម្លើយអ្នកភូមិនៅក្បែរកន្លែងកើតហេតុបានប្រាប់សមត្ថកិច្ចថា មានម៉ូតូមួយគ្រឿងម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០២០ ពាក់ស្លាកលេខ ស្វាយរៀង១P-៦២០០ ជិះគ្នា២នាក់ក្នុង
ទិសដៅពីជើងទៅត្បូង ខណៈនោះស្រាប់តែមានរថយន្តធុនធំមានទ្រុងខ្ពស់បើកបរពីត្បូងទៅជើងមិនប្រកាន់ស្ដាំបានបុកម៉ូតូយ៉ាងពេញទំហឹងលាន់សូរដូចរន្ទះបង្កការភ្ញាក់ផ្អើលតែម្ដង។
ក្រោយមកអ្នករបួសធ្ងន់ត្រូវបានបងប្អូនបញ្ជូនទៅមន្ទីរពេទ្យខេត្តស្វាយរៀង ចំណែកសពត្រូវបានសមត្តកិច្ចធ្វើកំណត់ហេតុនិងបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី រីឯរថយន្តបង្កហេតុសមត្ថកិច្ចកំពុងស្រាវជ្រាវដើម្បីយកមកចាត់ការបន្តតាមច្បាប់៕ ដោយ៖សុថាន
