នៅថ្ងៃទី 14 ខែមករា ព្រះមហាក្សត្រិយានី Margrethe II បានដាក់រាជ្យ ហើយអ្នកស្នងរាជ្យជំនួសគឺបុត្រា របស់ព្រះអង្គ ព្រះនាម Frederik ត្រូវបានឡើងគ្រងរាជ្យជាថ្មី ជាផ្លូវការ។

នៅថ្ងៃចូលឆ្នាំសកល មហាក្សត្រិយានីដាណឺម៉ាក មានព្រះជន្ម ៨៣ ព្រះវស្សា ដែលជាស្តេចកាន់អំណាចយូរជាងគេនៅអឺរ៉ុប បានធ្វើសេចក្តីប្រកាសដ៏គួរឱ្យភ្ញាក់ផ្អើលថា ព្រះអង្គនឹងដាក់រាជ្យនៅឆ្នាំថ្មី ឆ្នាំ2024 ។ គេដឹងថា ម្ចាស់ក្សត្រី Margrethe គឺជាស្តេចដាណឺម៉ាកដំបូងគេដែលដាក់រាជ្យ ចាប់តាំងពីស្តេច Erik III ក្នុងឆ្នាំ ១១៤៦ ។
នៅថ្ងៃទី 14 ខែមករា (ម៉ោងក្នុងស្រុក) ព្រះមហាក្សត្រិយានី Margrethe II បានដាក់រាជ្យជាផ្លូវការដោយប្រគល់រាជបល្ល័ង្ក ទៅឱ្យព្រះរាជបុត្រារបស់ព្រះអង្គគឺព្រះអង្គម្ចាស់ Frederik ។
យោងតាមប្រព័ន្ធផ្សព្វផ្សាយក្នុងស្រុក នៅម៉ោង 1:30 រសៀល ថ្ងៃទី 14 ខែមករា (ម៉ោងក្នុងតំបន់) ម្ចាស់ក្សត្រី Margrethe II បានចាកចេញពីព្រះរាជដំណាក់របស់ព្រះអង្គនៅឯវិមាន Amalienborg នៃទីក្រុង Copenhagen ដើម្បីជិះរទេះគោខ្លី ទៅកាន់វិមាន Christiansborg ដែលជាកន្លែងធ្វើការ របស់រដ្ឋាភិបាលនិងសភា។
នៅព្រះបរមរាជវាំង វេលាម៉ោង២រសៀល ព្រះមហាក្សត្រិយានី បានប្រកាសដាក់រាជ្យ ដោយបញ្ចប់ការសោយរាជ្យរយៈពេល៥២ឆ្នាំ នៅចំពោះមុខ ក្រុមប្រឹក្សារដ្ឋ។ ព្រះអង្គម្ចាស់ Frederik ត្រូវបានប្រកាសថាជាស្តេច Frederik X ដោយនាយករដ្ឋមន្ត្រី Mette Frederiksen នៅវេទិកានៃវិមាន Christiansborg ។
មនុស្សរាប់ម៉ឺននាក់ បានប្រមូលផ្តុំគ្នានៅតាមដងផ្លូវ នៃរដ្ឋធានីដាណឺម៉ាក នៅថ្ងៃទី 14 ខែមករា ដើម្បីស្វាគមន៍ព្រះមហាក្សត្រថ្មី និងលាព្រះមហាក្សត្រិយានី Margrethe ទោះបីជាអាកាសធាតុត្រជាក់ក៏ដោយ។ នៅម៉ោង 3:00 រសៀល ទ្វារ Christiansborg បានបើក ហើយស្តេច Frederik បានយាងចេញ ដោយគ្រវីព្រះហស្តទៅកាន់ហ្វូងមនុស្សដែលកំពុងបាញ់ក្រដាស ចាក់ស្រាសំប៉ាញនិងគ្រវីទង់ជាតិ។
ទោះបីជា រាជាធិបតេយ្យដាណឺម៉ាក មានអាយុកាលជាង 1,000 ឆ្នាំមកហើយក៏ដោយ ក៏គ្រួសាររាជវង្សរបស់ប្រទេសនេះ មានតួនាទីត្រឹមតែកំណត់នៅក្រោមរដ្ឋធម្មនុញ្ញរបស់ប្រទេស។ អំណាចផ្លូវការជាកម្មសិទ្ធិរបស់សភានិងរដ្ឋាភិបាល ជាប់ឆ្នោតរបស់ប្រទេស ដែលមានទីស្នាក់ការនៅវិមាន Christiansborg នាកណ្តាលទីក្រុង Copenhagen ។
ទោះបីជាយ៉ាងនេះក្តី ជនជាតិ Danes មានមោទនភាពយ៉ាងខ្លាំង ចំពោះគ្រួសាររាជវង្សរបស់ពួកគេ ហើយស្តេចមានតួនាទី ជាឯកអគ្គរាជទូតដ៏សំខាន់៕ ដោយធីរីណា

រូប​ថត​: VNF