ខេត្តកោះកុង៖ លោក ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម អមដោយថ្នាក់ដឹកនាំ និងមន្ត្រីបច្ចេកទេសក្រសួង នៅថ្ងៃសៅរ៍ទី២០ ខែមករា ឆ្នាំ២០២៤នេះ បានអញ្ជើញជួបប្រជុំពិភាក្សាជាមួយទ្វេភាគីលោកស្រី មិថុនា ភូថង អភិបាលនៃគណៈអភិបាលខេត្តកោះកុង។
សូមជម្រាបថា កិច្ចប្រជុំដ៏មានសារសំខាន់នាពេលនេះមានការចូលរួមពី លោក លោកស្រី អភិបាលរងនៃគណៈអភិបាលខេត្តកោះកុង ប្រធានមន្ទីរធនធានទឹក និងឧតុនិយមខេត្តកោះកុង លោក លោកស្រី ប្រធាន អនុប្រធានមន្ទីរពាក់ព័ន្ធទាំងអស់ជុំវិញសាលាខេត្តកោះកុង លោក លោកស្រី អភិបាល អភិបាលរងនៃគណៈអភិបាលស្រុកស្រែអំបិល ស្រុកបូទុមសាគរ ស្រុកកោះកុង និងក្រុងខេមរភូមិន្ទ។
នាឱកាសនោះ លោករដ្ឋលេខាធិការ បានឱ្យដឹងថា កិច្ចប្រជុំទ្វេភាគីនេះដើម្បីចាត់វិធានការឱ្យបានម៉ឺងម៉ាត់ក្នុងការអនុវត្តនូវប្រសាសន៍ដ៏ខ្ពង់ខ្ពស់បំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាក្នុងឱកាសជួបសំណេះសំណាលជាមួយបងប្អូនកម្មករជាងមួយម៉ឺននាក់នៅខេត្តកោះកុងនាពេលកន្លងទៅ ត្រូវយកចិត្តទុកដាក់បំផុតនូវតម្រូវការទឹកសម្រាប់បម្រើឱ្យជីវភាពប្រចាំថ្ងៃរបស់បងប្អូនប្រជាពលរដ្ឋនិងកម្មករដែលកំពុងមានការកើនឡើងជាប្រចាំ និងតម្រូវការចាំបាច់ក្នុងការប្រើប្រាស់លើគ្រប់វិស័យពាក់ព័ន្ធនានា។
លោករដ្ឋលេខាធិការ បានលើកឡើងថា ក្រសួងធនធានទឹក និងឧតុនិយម និងថ្នាក់ដឹកនាំខេត្តកោះកុងត្រូវតែសហការគ្នាអនុវត្តឱ្យបាននូវក្រឹត្យច្បាប់ជាធរមានក្នុងការគ្រប់គ្រងវិស័យធនធានទឹក និងឧតុនិយម ការប្រើប្រាស់ទឹកនិងការបញ្ជាទឹកឱ្យបានត្រឹមត្រូវសម្រាប់បម្រើឱ្យខេត្តកោះកុងទឹកដីតារារះនៅទិសនិរតីនៃប្រទេសឱ្យបានស័ក្តិសមជាប៉ូលទេសចរណ៍ និងបម្រើឱ្យវិស័យឧស្សាហកម្មដែលកំពុងតែកើនឡើងដ៏សកម្ម ក្រោមការដឹកនាំរបស់រាជរដ្ឋាភិបាលនីតិកាលទី៧ នៃរដ្ឋសភា។
លោករដ្ឋលេខាធិការមានប្រសាសន៍ថា ខេត្តកោះកុងទាំងមូលជារឿយៗ មានការខ្វះខាតទឹកសម្រាប់ប្រើប្រាស់លើគ្រប់វិស័យ ក្នុងពេលដែលខេត្តភាគនិរតីមួយនេះបានទទួលរបបទឹកភ្លៀងដ៏សម្បូរបែបចំនួន ៤០០០ មីលីម៉ែត្រ ក្នុងផ្ទៃរងទឹកភ្លៀង ១,៥លានហិកតា ក្នុងធារទឹកចំនួន ៦០កោដិម៉ែត្រត្រីគុណ ត្រូវហូរធ្លាក់ចូលទៅក្នុងសមុទ្រជារៀងរាល់ឆ្នាំតាមជ្រោះជ្រលងភ្នំក្រវាញខាងត្បូង តាមច្រកព្រែកតាតៃ ព្រែកត្រពាំងរូង ព្រែកកោះប៉ោ ព្រែកអណ្តូងទឹក និងតាមព្រែកស្រែអំបិល។
រដ្ឋលេខាធិការរូបនេះ បានបញ្ជាក់ថា ក្រសួងធនធានទឹក និងឧតុនិយម នឹងសហការយ៉ាងជិតស្និទ្ធបំផុតជាមួយក្រសួងសេដ្ឋកិច្ច និងហិរញ្ញវត្ថុ និងដៃគូអភិវឌ្ឍន៍ទាំងអស់ ដើម្បីធ្វើឱ្យខេត្តកោះកុងដែលប្រកបដោយសក្តានុពលទឹកមួយនេះធានាបាននូវសន្តិសុខទឹកសម្រាប់ប្រើប្រាស់ក្នុងគ្រប់វិស័យឱ្យមានលក្ខណៈល្អប្រសើរឡើងជាបន្តបន្ទាប់នាពេលដ៏ខ្លីខាងមុខនេះ៕ដោយ៖តារា
