ភ្នំពេញ ៖ កុមារ៉ា វ៉ាន់ ចាន់សុធារ៉ា អាយុ ៤ ឆ្នាំ មានជំងឺភ្នែកឡើងបាយពីកំណើតបណ្តាលឱ្យមើលមិនច្បាស់ ត្រូវសម្តេចធិបតី និងលោកស្រី ជួយទំនុកបម្រុងព្យាបាលបានជោគជ័យហើយ ! ។ នេះបើយោងតាមការបញ្ជាក់ពី ក្រុមគ្រូពេទ្យស្ម័គ្រចិត្តយុវជនសម្តេតេជោ(TYDA) នៅថ្ងៃទី២២ ខែមករា ឆ្នាំ២០២៤ នេះ ។

សូមបញ្ជាក់ថា ៖ កុមារ៉ា វ៉ាន់ ចាន់សុធារ៉ា អាយុ ៤ ឆ្នាំ រស់នៅភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ​ មានជំងឺភ្នែកឡើងបាយពីកំណើតបណ្តាលឱ្យមើលមិនច្បាស់ ។

ដោយក្តីសប្បុរសធម៌ដ៏ខ្ពង់ខ្ពស់ពីសំណាក់ សម្តេចមហាបវរធិបតី ហ៊ុន ម៉ាណែត និងលោកស្រីបណ្ឌិត ពេជ ចន្ទមុន្នី ហ៊ុនម៉ាណែត, លោកទាំងទ្វេបានចាត់ឱ្យក្រុមគ្រូពេទ្យស្ម័គ្រចិត្តយុវជនសម្តេតេជោ(TYDA) ធ្វើការបញ្ជូនក្មួយប្រុសមកទទួលការព្យាបាលនៅមន្ទីពេទ្យព្រះអង្គឌួង កាលពីថ្ងៃទី១៤ ខែធ្នូ ឆ្នាំ២០២៣ កន្លងទៅ ។ ក្រុមគ្រូពេទ្យឯកទេស បានធ្វើការវះកាត់ និងព្យាបាលភ្នែករបស់ក្មួយប្រុសយ៉ាងយកចិត្តទុកដាក់រហូតទទួលបានជោគជ័យ ។ បច្ចុប្បន្ននេះ ក្មួយប្រុសមើលឃើញច្បាស់ជាថ្មីឡើងវិញ ជាមួយនឹងអារម្មណ៍រំភើបរីករាយជាអនេក ។

រាល់ការចំណាយទាំងអស់ទាំងក្នុងការព្យាបាល វះកាត់ អាហារ និងការស្នាក់នៅ ត្រូវបានឧបត្ថម្ភទំនុកបម្រុងដោយ សម្តេចមហាបវរធិបតី ហ៊ុន ម៉ាណែត និងលោកស្រីបណ្ឌិត ពេជ ចន្ទមុន្នី ហ៊ុនម៉ាណែត ផងដែរ។
សូមអរគុណក្រុមគ្រូពេទ្យ TYDA ៕

ដោយ ៖ សិលា