ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងថា ៖ កម្ពុជាដែលធ្លាប់ត្រូវបានហែកហួរដោយសង្រ្គាម និងធ្លាប់តែល្បីថាជាវាលពិឃាត ជាតំបន់អសន្តិសុខដែលគ្រប់គ្នាភ័យខ្លាច ឥឡូវបានប្រែក្លាយជារដ្ឋអធិបតេយ្យនិងឯករាជ្យ ដែលមានសុខសន្តិភាព នីតិរដ្ឋ និងស្ថិរភាពនយោបាយ ស្របតាមគោលការណ៍នៃលទ្ធិប្រជាធិបតេយ្យ សេរីពហុបក្ស និងមានព្រះមហាក្សត្រជាទីគោរពដ៏ខ្ពង់ខ្ពស់ ទ្រង់គង់ជាម្លប់ដ៏ត្រជាក់។
សម្តេចធិបតី ហ៊ុន ម៉ាណែត បានថ្លែងបន្តថា ៖ កម្ពុជាដែលត្រូវបានដាក់អោយឯកោទាំងនយោបាយ និងសេដ្ឋកិច្ច ឥឡូវបានធ្វើសមាហរណកម្មពេញលេញ ព្រមទាំងបានដើរតួនាទីយ៉ាងសំខាន់ក្នុងការរក្សាសណ្តាប់ធ្នាប់ និងសន្តិភាពនៅក្នុងសកលលោក ក្រោមឆត្រនៃអង្គការសហប្រជាជាតិ។
នៅក្នុងឱកាសដែលសម្តេចអញ្ជើញជាអធិបតីក្នុងពិធីអបអរសាទរ «ខួបអនុស្សាវរីយ៍លើកទី២៥ ថ្ងៃបង្កើតបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ ២៤ មករា ១៩៩៩ – ២៤ មករា ២០២៤» នៅព្រឹកថ្ងៃទី ២៤ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា ចំណុចទាំងអស់នេះបញ្ជាក់អោយឃើញថា ទោះបីជាបញ្ជាការដ្ឋានកងទ័ពជើងគោកទើបតែបង្កើតក្នុងរយៈពេល ២៥ ឆ្នាំ ក៏ដោយ ប៉ុន្តែកងកម្លាំងរបស់កងទ័ពជើងគោក ពោលគឺនាយទាហាន នាយទាហានរង និងពលទាហាន បានចូលរួមក្នុងគ្រប់ដំណាក់កាលនៃការអភិវឌ្ឍប្រទេសជាតិ រាប់ចាប់ពីការចូលរួមកសាងរណៈសិរ្សសាមគ្គីសង្រ្គោះជាតិឆ្នាំ ១៩៧៨ ផងដែរ។
នាយករដ្ឋមន្ត្រីជំរុញការធ្វើទំនើបប្រកាន់យោធា ដោយថាវិធីសាស្ត្រយោធាពីមុនមិនអាចប្រយុទ្ធក្នុងសង្គ្រាមអនាគតបាននោះទេ។
សម្ដេចធិបតី ហ៊ុន ម៉ាណែត បានលើកឡើងថាពីភាពទំនើបនៃសង្គ្រាមបច្ចុប្បន្ន ដែលឈានដល់ការប្រើប្រាស់យន្តហោះគ្មានមនុស្សបើក ការប្រើផ្កាយរណបស៉ើបការណ៍ ការបំពាក់ប្រព័ន្ធបច្ចេកវិទ្យាលើអាវុធជាដើម ដែលត្រូវការឲ្យមានការបង្កើនសមត្ថភាពនិងធ្វើទំនើបកម្មទៅលើយុទ្ធសាស្ត្រសង្គ្រាមបែបនេះ។
ទោះជាយ៉ាងណាសម្ដេចក៏បានស្នើទៅដល់យោធាដែលធ្លាប់ឆ្លងកាត់បទពិសោធន៍ផ្ទាល់ ក្នុងការផ្ទេរនូវបទពិសោធន៍ និងយុទ្ធសាស្ត្រដល់យោធាជំនាន់ក្រោយផងដែរ។
សម្ដេចអធិបតីបានបញ្ជាក់ថា ៖ កម្ពុជាគ្មានមហិច្ឆតាក្នុងការរំលោភឈ្លានពានប្រទេសណាទេ ប៉ុន្តែមានសិទ្ធិក្នុងការធ្វើទំនើបកម្មយោធាដើម្បីការពារខ្លួន៕
ដោយ ៖ សិលា
