ខេត្តកំពង់ស្ពឺ÷ យោងតាមរបាយការណ៍របស់សមត្ថកិច្ចខេត្តកំពង់ស្ពឺបានអោយដឹងនៅព្រឹកថ្ងៃទី២៩ខែមករាឆ្នាំ២០២៤នេះថា មានករណីគ្រោះថ្នាក់ចរាចរណ៍មួយបានកើតឡើងបង្កដោយរថយន្តដឹកដីមួយគ្តឿងម៉ាក NISSAN DIESEL បានបើកបុកក្មេងប្រុសម្នាក់បណ្តាលអោយស្លាប់ខណៈរូបគេកំពុងដើរតាមផ្លូវ ហើយអ្នកបើករថយន្តបង្កបានរត់គេចខ្លួនបាត់។ ជនរងគ្រោះមានឈ្មោះ អាន រ៉ាឌី   ភេទ​ប្រុស​ អាយុ​៤ឆ្នាំ​ (ស្លាប់ភ្លាមៗនៅនឹងកន្លែង) រស់នៅក្នុងភូមិឃុំកើតហេតុខាងលើ ។

ក្នុងរបាយការណ៍ដដែលបានអោយដឹងទៀតថា ហេតុការណ៍នេះកើតឡើងកាលពីថ្ងៃទី២៨ ខែមករា ឆ្នាំ២០២៤ វេលាម៉ោង២និង៤៥នាទី នៅត្រង់ចំណុចផ្លូវលំ ភូមិថ្មគប់ ឃុំអមលាំង ស្រុកថ្ពង ខេត្តកំពង់ស្ពឺ ។

នគរបាលមូលដ្ឋានបានឱ្យដឹងថា មុនកើតហេតុគេឃើញរថយន្តមួយគ្រឿងម៉ាក NISSAN DIESEL  ពណស ពាក់
ស្លាកលេខ ចង្កូតស្តាំ KPS-1910   មិនស្គាល់អត្តសញ្ញាណនិងមិនស្គាល់អាសយដ្ឋានអ្នកបើកបរ (បានរត់គេចខ្លួន ) បើកបរពីទិសខាងត្បូងទៅទិសខាងជើង។

ក្រោយពេលកើតហេតុ អ្នកបើកបររថយន្តបានរត់គេចខ្លួនបាត់ ចំពោះវត្ថុតាងរថយន្តមួយគ្រឿងខាងលើបានយកទៅរក្សាទុកនៅប៉ុស្តិ៍នគរបាលរដ្ឋបាលអមលាំងហើយសមត្ថកិច្ចកំពុងស្រាវជ្រាវរកអ្នកបើកបរជាជនបង្ក ដើម្បីចាត់ការតាមនីតិវិធី ។ ចំណែកសពក្មេងប្រុសសមត្ថកិច្ចបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី៕ដោយ÷ចន្ទ លីហ្សា