កំពង់ឆ្នាំង ៖ អ្នកបើកបរ រថយន្ត និងម៉ូតូ ជាង១០០នាក់ ត្រូវបានសមត្ថកិច្ចនគរបាលឃាត់ធ្វើការអប់រំ ក្នុងពេលសមត្ថកិច្ចចុះអនុវត្តច្បាប់ចរណ៍ ត្រួតពិនិត្យអាវុធជាតិផ្ទុះ នៅលើផ្លូវ  ២គោលដៅក្នុងភូមិសាស្រ្តស្រុកកំពង់ត្រឡាច  ។

លោក វរៈសេនីឯក នន ស៊ីណាត អធិការស្រុកកំពង់ត្រឡាច បានប្រាប់ឲ្យដឹងថាកម្លាំងសមត្ថកិច្ច សហការជាមួយរដ្ឋបាលស្រុក កាលពីវេលាម៉ោង២១និង០០នាទី ដល់ម៉ោង២៤និង០០នាទី ថ្ងៃទី៣ ខែកុម្ភៈ ឆ្នាំ២០២៤ បានចុះអនុវត្ត២គោលដៅផ្សេងគ្នាក្នុង ស្រុកកំពង់ត្រឡាច ដែលគោលដៅទី១ នៅចំណុចផ្លូវខេត្តលេខ១៥០A ចន្លោះបង្គោលគីឡូម៉ែត្រលេខ០១-០២ ភូមិអូរឫស្សី ឃុំអូរឬស្សី ស្រុកកំពង់ត្រឡាច ខេត្តកំពង់ឆ្នាំង និងគោលដៅទី២ នៅលើផ្លូវខេត្តលេខ១៥៣ ចន្លោះបង្គោលគីឡូម៉ែត្រលេខ០១-០២ ភូមិដើមពពេល ឃុំថ្មឥដ្ឋ  ស្រុកកំពង់ត្រឡាច ខេត្តកំពង់ឆ្នាំង។

ជាលទ្ធផល ចុះអនុវត្តច្បាប់ចរណ៍ ត្រួតពិនិត្យអាវុធជាតិផ្ទុះ កម្លាំងសមត្ថកិច្ច ឃាត់អ្នកបើកបរ១០៥នាក់ ធ្វើការអប់រំ និងមានមធ្យោបាយធ្វើដំណើរ ម៉ូតូ៦៦គ្រឿង និងរថយន្ត១០គ្រឿង។ក្រោយពីធ្វើការអប់រំ ណែនាំរួច សមត្ថិច្ច បានឲ្យវិលត្រឡប់ទៅផ្ទះវិញ៕ ចន្ថា