ភ្នំពេញ៖ ជនសង្ស័យចំនួន៣នាក់ ជាមុខសញ្ញាកាច់សោករម៉ូតូត្រូវបានកម្លាំងសមត្ថកិច្ចផ្ទុះអាវុធជាច្រើនគ្រាប់

ដើម្បីឃាត់ខ្លួនបាន បន្ទាប់ពីជនសង្ស័យទាំង៣នាក់នោះ ឃើញសមត្ថកិច្ចកំពុងជិះល្បាតក្នុងភូមិសាស្រ្ត ព្យាយាមបើកម៉ូតូរត់គេចខ្លួន។

ហេតុការណ៍នេះបានបង្កឲ្យមានការភ្ញាក់ផ្អើលឡើង
កាលពីម៉ោង២រំលងអធ្រាត្រឈានចូល ថ្ងៃទី២៤ ខែកុម្ភៈ ឆ្នាំ២០២ ចំណុចក្បែរឃ្លាំងអេតចាយមួយកន្លែង ស្ថិតនៅលើកំណាត់ផ្លូវ ភ្នំពេញហាណូយ ក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ។

ប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុ ពួកគាត់កំពុងតែដេកលង់លក់ក៏ស្រាប់តែបានឮសម្លេងស្នូរកាំភ្លើង បាញ់ចំនួន២ ទៅ ៣គ្រាប់ ភ្លាមៗនោះប្រជាពលរដ្ឋបាននាំគ្នារត់ចេញមកក្រៅផ្ទះ ស្រាប់តែឃើញសមត្ថកិច្ចប្រដាប់ទៅដោយអាវុធ
បានប្រដេញតាមចាប់ជនសង្ស័យ៣នាក់ ខណៈឃាត់ខ្លួនបាន២នាក់ និងម្នាក់ទៀតផ្លោះរបងរត់គេចខ្លួនបាត់។

ប្រភពព័ត៌មានពីសមត្ថកិច្ចមូលដ្ឋានឲ្យដឹងដែរថា មុនពេលឈានដល់ការឃាត់ខ្លួន សមត្ថកិច្ចយើងកំពុងតែល្បាតក្នុងមូលដ្ឋាន ស្រាប់តែប្រទះឃើញជនសង្ស័យទាំង៣នាក់ ជិះម៉ូតូឌុបគ្នា ម៉ាកស៊ុយស៊ូគី វីវ៉ា ពណ៌ខ្មៅ ពាក់ស្លាកលេខ ភ្នំពេញ 1HL-7029 ធ្វើដំណើរតាមបណ្តោយផ្លូវហាណូយ ឆ្លងកាត់ពួកគាត់ ដោយមានការសង្ស័យ ទើបសមត្ថកិច្ចហៅសួរនាំ ស្រាប់តែជនសង្ស័យទាំង៣នាក់ ធ្វើសកម្មភាពជិះរត់គេចតែម្តង ព្រមទាំងបើកម៉ូតូកៀរម៉ូតូសមត្ថកិច្ចយើងថែមទៀត រហូតដួលម៉ូតូខ្លួនឯង ត្រូវសមត្ថកិច្ចឃាត់ខ្លួនបាន ឆែកមើលក៏ឃើញមានវត្ថុតាងមួយចំនួន សង្ស័យជាឧបករណ៍សម្រាប់ធ្វើសកម្មភាពកាច់សោករម៉ូតូផងដែរ។

បន្ទាប់ពីកើតហេតុសមត្ថកិច្ចបាននាំខ្លួនជនសង្ស័យទាំង៣នាក់ រួមទាំងម៉ូតូ និងវត្ថុតាងមួយចំនួនទៅប៉ុស្តិ៍នគរបាលដើម្បីសាកសួរ និងអនុវត្តតាមនីតិវិធីបន្ត៕ជ្រោយពេជ្រ