ខេត្តស្វាយរៀង: សមត្ថកិច្ចនគរបាល បានធ្វើការឃាត់ខ្លួនជនសង្ស័យ២នាក់ មកសាកសួរ បន្ទាប់ពីបានប្រើហឹង្សាព្រួតវាយគ្នាបណ្ដាលអោយបុរសម្នាក់រងរបួសធ្ងន់សន្លប់ស្ដូកស្ដឹងគ្រាន់តែមានទំនាស់ពាក្យសំដីនិងឈ្លោះប្រកែកគ្នា នៅស្រុករំដួល។
ហេតុការណ៍នេះបានកើតឡើងនៅវេលាម៉ោង៥និង៣០នាទីល្ងាច ថ្ងៃទី៣ ខែមីនាឆ្នាំ២០២៤ ស្ថិតក្នុងចំណុចភូមិត្រពាំងថ្កូវឃុំពងទឹកស្រុករំដួលខេត្តស្វាយរៀង។
យោងតាមសមត្ថកិច្ចនគរបាលស្រុកបានអោយដឹងថាជនសង្ស័យមានឈ្មោះ
ភឿង សុភក្រ័ អាយុ៣៦ឆ្នាំមុខរបរកសិករ និង ឈ្មោះវង់ អំ ភេទប្រុសអាយុ ២៤ឆ្នាំ។មុខរបរកសិកររស់នៅភូមិត្រពាំងថ្កូវឃុំពងទឹកស្រុករំដួលខេត្តស្វាយរៀង។
ចំណែកជនរងគ្រោះមានឈ្មោះយ៉េង រតនា ភេទប្រុសអាយុ ៣៦ ឆ្នាំមុខរបរកសិកររស់នៅភូមិត្រពាំងថ្កូវឃុំពងទឹកស្រុករំដួលខេត្តស្វាយរៀង ។
ប្រភពបន្តថាមុនកើតហេតុ គេឃើញជនរងគ្រោះនិងជនសង្ស័យទាំង២នាក់បាននិយាយ គ្នា រហូតបានឈ្លោះប្រកែកគ្នាមាត់ធំមាត់តូចឈានដល់ប្រើហឹង្សាវាយមកលើជនរងគ្រោះបង្កការភ្ញាក់ដល់អ្នកភូមិនាំគ្នាឃាត់និងរាយការណ៏មកសមត្ថកិច្ចមូលដ្ឋានមកអន្តរាគមន៏និងឃាត់ជនសង្ស័យមកសាកសួរ។
ចំណែកជនរងគ្រោះត្រូវបានក្រុមគ្រួសារ ប្រញាប់ប្រញាល់ ដឹកយកទៅព្យាបាលនៅឯមន្ទីរពេទ្យបង្អែកខេត្តស្វាយរៀង។
បច្ចុប្បន្ន ឯជនសង្ស័យទាំង២នាក់ត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលស្រុកដើម្បីចាត់ការបន្តតាមច្បាប់៕
