ខេត្តបន្ទាយមានជ័យៈ ជនសង្ស័យម្នាក់ត្រូវបានកម្លាំងការិយាល័យព្រហ្មទណ្ឌ បញ្ជាការដ្ឋានកងរាជឣាវុធហត្ថខេត្តបញ្ជូនទៅសាលាដំបូងខេត្តនៅព្រឹកថ្ងៃ ទី១៤ ខែមីនា ឆ្នាំ២០២៤នេះ ដើម្បីឣនុវត្តតាមនីតិវិធី។
សមត្ថកិច្ចប្រាប់ថាៈ នៅថ្ងៃទី១២ ខែកុម្ភៈ ឆ្នាំ២០២៤ ជនរងគ្រោះឈ្មោះ ចាន់ គឹមជា ភេទប្រុស ឣាយុ៣៨ឆ្នាំ បច្ចុប្បន្ន រស់នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត បាននាំឈ្មោះ មួយ បូរិន ភេទប្រុស ឣាយុ២៤ឆ្នាំមកមូលដ្ឋានកងរាជឣាវុធហត្ថក្រុងប៉ោយប៉ែត ដើម្បីឆ្លើយបំភ្លឺ ស្ដីពីការយករថយន្ត១គ្រឿងម៉ាកFORD TERRITORY ពណ៌ខ្មៅ ផលិតឆ្នាំ២០២៣ ពាក់ផ្លាកលេខកម្ពុជា HENG 1667 មកដាក់បញ្ចាំនៅហាងរបស់ខ្លួនដែលមានឈ្មោះ ឣេស ឣុិន ប៊ី (SNB) នូវទឹកប្រាក់ចំនួន២០,០០០$(ពីរម៉ឺនដុល្លារ) ដោយឈ្មោះ មួយ បូរិនបានប្រាប់ថា រថយន្តនោះជារបស់ខ្លួនផ្ទាល់ ទិញមកពីខេត្តឧត្តរមានជ័យ ហើយមានភ្ជាប់មកជាមួយនូវឯកសារដូចជា បណ្ណសំគាល់រថយន្តម្ចាស់ដើម លិខិតទិញ-លក់រថយន្ត និងឯកសារមួយចំនួនទៀត ដោយហាងបញ្ចាំរបស់ខ្លួនយកការប្រាក់១.៧% ហើយបានយល់ព្រមទទួលបញ្ចាំ និងប្រគល់ប្រាក់ទៅឱ្យឈ្មោះ មួយ បូរិន ចំនួន២០,០០០$(ពីរម៉ឺនដុល្លារ) ហើយបានរៀបចំឯកសារគ្រប់គ្រាន់។ ក្រោយមកក្រុមការងារហាងបញ្ចាំបានត្រួតពិនិត្យលើឯកសាររថយន្ត ទើបដឹងថាជាឯកសារក្លែងក្លាយ ហើយក្រុមការងារហាងបញ្ចាំរបស់ខ្លួនបានហៅឈ្មោះ មួយ បូរិន មកដោះស្រាយរឿងយកឯកសារក្លែងក្លាយមកដាក់បញ្ចាំ នៅមូលដ្ឋានកងរាជឣាវុធហត្ថក្រុងតែម្ដង។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជឣាវុធហត្ថក្រុងប៉ោយប៉ែតបានឱ្យដឹងថា បើតាមការរៀបរាប់របស់ឈ្មោះ មួយ បូរិន បានរៀបរាប់ថា រូបខ្លួនមានមុខរបរលក់-ទិញម៉ូតូនៅក្រុងសិរីសោភ័ណ ខេត្តបន្ទាយមានមានជ័យ ហើយរូបខ្លួនតែងតែឡើងទៅក្រុងប៉ោយប៉ែតដើម្បីលេងល្បែងក្នុងកាស៊ីណូសែនផាលិស ពេលកំពុងលេងស្រាប់តែមានមនុស្សប្រុសចំនួន៣នាក់ពុំដែលស្គាល់ ជិះរថយន្តចំនួន២គ្រឿង គឺ រថយន្តម៉ាកនីសាន់ ពណ៌ស១គ្រឿង មិនចាំផ្លាកលេខ និងរថយន្តម៉ាកFORD TERRITORY ពណ៌ខ្មៅ១គ្រឿង បានប្រើឱ្យរូបខ្លួនឈរឈ្មោះយករថយន្តម៉ាកFORD TERRITORY ទៅដាក់បញ្ចាំដោយឱ្យថ្លៃឈ្នួលចំនួន៦០០ដុល្លារ ហើយខ្លួនក៏យល់ព្រម ។ បន្ទាប់មកបានធ្វើឯកសារលក់-ទិញរថយន្តទាំងយប់ ដោយដាក់ឈ្មោះខ្លួនជាឣ្នកទិញពីម្ចាស់ដើមឈ្មោះ ជា ចាន់ហេង ហើយនៅថ្ងៃទី១ ខែកុម្ភ: ឆ្នាំ២០២៤ ខ្លួនបានយករថយន្ដ (ម៉ាកFORD TERRITORY ពណ៌ខ្មៅ ផលិតឆ្នាំ២០២៣ ពាក់ផ្លាកលេខកម្ពុជា HENG 1667 ទៅដាក់បញ្ចាំនៅហាងបញ្ចាំឈ្មោះ SNB យកប្រាក់ចំនួន២០,០០០ដុល្លារ ហើយខាងបុគ្គលិកបញ្ចាំទាមទារយកឯកសាររថយន្តទៅពិនិត្យ។ ក្រោយពីពិនិត្យឯកសាររួច ខាងហាងបញ្ចាំយល់ព្រម ហើយបានប្រគល់ប្រាក់ចំនួន២០,០០០ដុល្លារ ដោយបាញ់ប្រាក់ចូលក្នុងកុងធនាគារABA របស់ខ្លួនដែលមានឈ្មោះ MOUY BORIN លេខកូដ002644430 បន្ទាប់ពីបានប្រាក់ រូបខ្លួនបានទៅជួបមនុស្សប្រុសទាំង៣នាក់នោះវិញ ហើយពួកគាត់បាននាំខ្លួនទៅដកប្រាក់នៅធនាគារABAហើយបានប្រគល់ប្រាក់ឈ្នូលឱ្យខ្លួនចំនួន៦០០ដុល្លារ។ ក្រោយពីដាក់បញ្ចាំបានរយ:ពេល១៥ថ្ងៃ រូបខ្លួនបានទំនាក់ទំនងទៅហាងបញ្ចាំស្នើសុំប្រាក់បន្ថែមចំនួន២,០០០ដុល្លារទៀត ពេលនោះបុគ្គលិកហាងបញ្ចាំប្រាប់ថា ស្នើបានតែចាំជួបមេសិន រហូតដល់ថ្ងៃទី១ ខែមីនា ឆ្នាំ២០២៤ បុគ្គលិកហាងបញ្ចាំទំនាក់ទំនងមកឱ្យរូបខ្លួនទៅបង់ការប្រាក់ តែខ្លួនសុំពន្យាពេល ក្រោយមកបុគ្គលិកហាងបញ្ចាំបានហៅខ្លួនទៅយកប្រាក់ដែលខ្លួនបានស្នើបន្ថែមចំនួន២,០០០ដុល្លារ ពេលខ្លួនទៅដល់ហាងបញ្ចាំម្ចាស់ហាងបានប្រាប់ឱ្យខ្លួនយកប្រាក់មកលោះយករថយន្តទៅវិញ ព្រោះបុគ្គលិកពិនិត្យលើឯកសារឃើញថាមិនប្រក្រតី តែរូបខ្លួនប្រាប់ថា គ្មានលទ្ធភាពទេ ទើបម្ចាស់ហាងបញ្ចាំនាំខ្លួនមកមូលដ្ឋានកងរាជឣាវុធហត្ថក្រុងប៉ោយប៉ែតតែម្តង។
លោកវរសេនីយ៍ត្រី នួន នីណារ៉ូ បានឱ្យដឹងទៀតថា ក្រោយបានស្ដាប់ការរៀបរាប់របស់ឈ្មោះ មួយ បូរិន ទើបលោកសុំគោលការណ៍ពីលោកឧត្តមសេនីយ៍ត្រី បោន ប៊ិន មេបញ្ជាការកងរាជឣាវុធហត្ថខេត្ត និងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជឣាជ្ញាឣមសាលាដំបូងខេត្តបន្ទាយមានជ័យ ទើបកម្លាំងជំនាញធ្វើការឃាត់ខ្លួនភ្លាមៗ ហើយកសាងសំណុំរឿងបញ្ជូននមកបញ្ជាការដ្ឋានកងរាជឣាវុធហត្ថខេត្តចាត់ការបន្តតាមនីតិវិធី។ ចំណែករថយន្តកម្លាំងជំនាញមូលដ្ឋានកងរាជឣាវុធហត្ថក្រុងធ្វើកំណត់ហេតុផ្ញើនៅហាងបញ្ចាំដើម្បីរក្សាទុកបណ្ដោះឣាសន្ន។
លោកវរសេនីយ៍ឯក ម៉ែន ភិរម្យ មេបញ្ជាការរងកងារជឣាវុធហត្ថខេត្ត ទទួលការងារស្រាវជ្រាវ និងបង្ក្រាបទល្មើសបានឱ្យដឹងថា ជនសង្ស័យខាងលើត្រូវបានកម្លាំងការិយាល័យព្រហ្មទណ្ឌ បញ្ជាការដ្ឋានកងរាជឣាវុធហត្ថខេត្តបញ្ជូនទៅសាលាដំបូងខេត្តដើម្បីឣនុវត្តតាមនីតិវិធី៕ ដោយវណ្ណា
