ភ្នំពេញ ៖ ក្នុងគោលបំណងដោះស្រាយបញ្ហាប្រឈមបរិស្ថាន ជាពិសេសសំរាមនៅក្នុងទឹកដែលកំពុងបំពុលទឹកទន្លេ ក្រសួងបរិស្ថាន និងសាលារាជធានីភ្នំពេញ សហការជាមួយ ក្រុមហ៊ុន Leader Energy Holding Berhad (Leader Energy) និងអង្គការសំអាតទន្លេ-សមុទ្រ (River Ocean Cleanup) បាន សម្ពោធកម្មវិធីសំអាតទន្លេ នៅកម្ពុជារយៈពេល៥ឆ្នាំជាផ្លូវការ នៅរាជធានីភ្នំពេញ នៅព្រឹកថ្ងៃពុធទី២០ ខែមីនា ឆ្នាំ២០២៤។

លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានបានថ្លែងថា៖ «បេសកកម្មនេះ ស្របតាមយុទ្ធសាយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧ ក្នុងការកសាង និងពង្រឹងមូលដ្ឋានគ្រឹះ ដើម្បីពន្លឿនការអភិវឌ្ឍជាតិ និងគាំទ្រដល់យុទ្ធសាស្ត្រចក្រារបស់ក្រសួងបរិស្ថាន ស្អាត បៃតង និងចីរភាព។

លោកបណ្ឌិត អ៊ាង សុផល្លែត បានបញ្ជាក់ថា *ការអនុវត្តយុទ្ធសាស្ត្រភាពស្អាត គឺក្រសួងបរិស្ថាន 

ភាពស្អាតបរិស្ថានជារូបវន្ត រួមមាន ភាពស្អាតលើផ្ទៃដី ដែលកន្លងមក យុទ្ធនាការកាត់បន្ថយការបើ ប្រាស់ប្លាស្ទិក បានចាប់ផ្តើមនៅថ្ងៃទី០១ ខែកញ្ញា ឆ្នាំ ២០២៣ ក្រោមប្រធានបទ «ថ្ងៃនេះ ខ្ញុំមិនប្រើថង់ ប្លាស្ទិកទេ» ទទួលបានជោគជ័យ។ គិតមកទល់ថ្ងៃនេះ មានការចូលរួម គាំទ្រពីសិស្សានុសិស្ស លោកគ្រូ អ្នកគ្រូ កម្មករ កម្មការិនី ព្រះសង្ឃ ក្រុមហ៊ុន រោងចក្រ សហគ្រាស អង្គការមិនមែនរដ្ឋាភិបាល ដៃគូរអភិវឌ្ឍន៍ រដ្ឋបាលថ្នាក់ក្រោមជាតិ និងប្រជាពលរដ្ឋ ដែលមាន ចំនួនសរុបជិត ៧លាន អង្គ/នាក់។ ជាបន្តនៅក្នុងជំហានបន្ទាប់ ក្រសួង និងត្រៀមដាក់ចេញយុទ្ធនាការសម្អាតកម្ពុជា ដែលជាយុទ្ធនាការដែលតម្រូវឱ្យប្រជាពលរដ្ឋចូលរួម ចំណាយពេល ១០នាទី ក្នុងមួយសប្ដាហសម្អាតបរិវេណផ្ទះ វត្តអារាម រោងចក្រ។ល។ 

ក្នុងឱកាសនោះ លោករដ្ឋមន្ត្រី បានសង្កត់ធ្ងន់បន្ថែមទៀតលើភាពស្អាតលើផ្ទៃមេឃ តាមរយៈ យុទ្ធនាការផ្ទៃមេឃព៌ណខៀវ បានចាប់ផ្ដើមនៅថ្ងៃទី១៥ ខែវិច្ឆិកា ឆ្នាំ២០២៣។ ក្រសួងបានចាត់វិធានការបន្តបន្ទាប់ក្នុងការត្រួតពិនិត្យ គុណភាពខ្យល់ តាមរោងចក្រ និងប្រភពអាចបង្កការ បំពុលខ្យល់ផ្សេងទៀត ដោយលទ្ធផលបានបញ្ជាក់ថា គុណភាពខ្យល់ក្នុងប្រទេសកម្ពុជា មិនទាន់ទទួលរង ការបំពុល និងមិនបង្កការបំពុលដល់ប្រទេសជិតខាងទេ។

លើសពីនេះគឺភាពស្អាតលើផ្ទៃទឹក លោកបណ្ឌិតរដ្ឋមន្រ្តី បានលើកឡើងពី យុទ្ធនាការសម្អាតផ្ទៃទឹក បានចាប់ផ្តើមនៅថ្ងៃទី០១ ខែមីនា ឆ្នាំ២០២៤ ដោយផ្តើម ចេញពីការសម្អាតផ្ទៃទឹកបឹងទន្លេសាប តាមរយៈការចាត់វិធានការទប់ស្កាត់ និងលុបបំបាត់ការហូរចូលនៃសំរាម សំណល់ប្លាស្ទិក និងថង់ប្លាស្ទិកចូលក្នុងប្រភពទឹក។ ហើយការបើកនូវកម្មវិធីសម្អាតទន្លេ នៅក្នុងថ្ងៃនេះ បង្ហាញពីការតាំងចិត្តនិងចូលរួមសំខាន់ថែមទៀតពីអ្នពាក់ព័ន្ធ ជាពិសេស កិច្ចសហការរវាងរាជរដ្ឋាភិបាល រដ្ឋបាលរាជធានី ខេត្ត អង្គការដៃគូសហការ និងវិស័យឯកជន ចូលរួមបេសកកម្មសំអាតទន្លេ នៅកម្ពុជារយៈពេល៥ឆ្នាំជាផ្លូវការ ដែលជំរុញទន្លេគ្មានការបំពុលដោយប្លាស្ទិក និងធ្វើឱ្យកម្ពុជាស្អាត

សូមបញ្ជាក់ថា គម្រោងសំអាតទន្លេ នឹងដំណើរការចាប់ពីឆ្នាំ២០២៤នេះ រហូតដល់ឆ្នាំ២០២៨ ហើយរួមបញ្ចូលផែនការដ៏ទូលំទូលាយមួយ ដែលរួមមានប្រតិបត្តិការសំអាតតាមដងទន្លេមេគង្គ ទន្លេសាប និងទន្លេបាសាក់ ព្រមទាំងកម្មវិធីអប់រំដែលផ្តោតលើការអប់រំការយល់ដឹងអំពីការទុកដាក់សំរាមរបស់ប្រជាពលរដ្ឋសហគមន៍នៅក្នុងមូលដ្ឋាន ក្នុងភូមិសាស្រ្តចំបហបងរបស់រាជធានីភ្នំពេញ និងខេត្តជាប់ដងទន្លេ។ លោក នូ សុវណ្ណ នាយកប្រតិបត្តិអង្គការសំអាតទន្លេ សមុទ្រ (ROC) បានលើកឡើងថា ជាមួយគ្នានេះ ការចូលរួមក្នុងការប្រមូលសំរាមតាមដងទន្លេ ជាជំហានសំខាន់មួយក្នុងការលើកកម្ពស់ភាពជាម្ចាស់សហគមន៍ និងឈានទៅរកទន្លេដែលគ្មានការបំពុលដោយថង់ប្លាស្ទិក។

លោក Dato Sean H’ng Chun Hsiang Executive Deputy Chairman នៃក្រុមហ៊ុន Leader Energy បានបញ្ជាក់ថា តាមរយៈបេសកកម្មនេះ យើងមានបំណងមិនត្រឹមតែកាត់បន្ថយផលប៉ះពាល់ដ៏អាក្រក់នៃការបំពុលនៅក្នុងទឹកនៃទន្លេរបស់កម្ពុជាប៉ុណ្ណោះទេ ប៉ុន្តែថែមទាំងផ្តល់សិទ្ធិអំណាច ដល់សហគមន៍មូលដ្ឋាន ឱ្យក្លាយជាអ្នកថែរក្សាបរិស្ថានធម្មជាតិផងដែរ»។

លោកបានបន្ថែមថា ដើម្បីធានាបាននូវការរក្សាអនាម័យប្រកបដោយនិរន្តរភាព បេសកកម្មនេះលើសពីការសំអាតកាកសំណល់ចេញពីក្នុងទន្លេ។ កាកសំណល់ផ្សេងៗដែលប្រមូលចេញទន្លេទាំងអស់ត្រូវបានបម្លែងជាថាមពលប្រើប្រាស់ឡើងវិញដើម្បីរក្សាបរិស្ថានល្អ៕

ដោយ ៖ សិលា