ភ្នំពេញ ៖ រដ្ឋបាលខណ្ឌប្ញស្សីកែវនាថ្ងៃព្រហស្បតិ៍ ទី​៤ ខែមេសា ឆ្នាំ​២០២៤​នេះ នៅបរិវេណសាលារៀន រីយ៉ាទ អន្តរជាតិ លោក ជិន ប៊ុនធឿន អភិបាលខណ្ឌប្ញស្សីកែវ បានអញ្ជើញសំណេះសំណាលសួរសុខទុក្ខបងប្អូនប្រជាពលរដ្ឋខ្មែរឥស្លាម ១៦៥គ្រួសារ និងក្មេងកំព្រា ៦០នាក់ រស់នៅក្នុងសង្កាត់ច្រាំងចំរេះទី២ ខណ្ឌប្ញស្សីកែវ ។

នាឱកាសនោះ លោក ជិន ប៊ុនធឿន បានផ្តាំផ្ញើសាកសួរពីសំណាក់ លោក ឃួង ស្រេង អភិបាលនៃគណៈអភិបាលរាជធានីភ្នំពេញ ជាពិសេស សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាប្រកបដោយសេចក្តីនឹករលឹក ។

លោកអភិបាលខណ្ឌ បានលើកឡើងថា រាជរដ្ឋាបាលកម្ពុជា ដឹកនាំដោយ សម្តេចធិបតី បន្តពីសម្តេចតេជោ ហ៊ុន សែន អតីតនាយករដ្ឋមន្ត្រី នៅតែបន្តយកចិត្តទុកដាក់គូរពីសុខទុក្ខ សុខុមាលភាពរបស់ប្រជាពលរដ្ឋទូទាំងប្រទេសដោយមិនប្រកាន់ជាតិសាសន៍ សាសនា ព័ណ៍សម្បុរ និន្នាការនយោបាយអ្វីឡើយ ។ លោកអភិបាលខណ្ឌ ក៏បានណែនាំឲ្យមន្ត្រីមូលដ្ឋានសង្កាត់ទាំង៧ក្នុងដែនដីខណ្ឌប្ញស្សីកែវ ត្រូវចុះជាប់ក្បែរប្រជាពលរដ្ឋជានិច្ច ដើម្បីដោះស្រាយបញ្ហា និងតម្រូវការចាំបាច់របស់ប្រជាពលរដ្ឋ សំដៅឲ្យពួកគាត់មានអារម្មរណ៍កក់ក្តៅ មានទំនុកចិត្ត ការស្រឡាញ់ ការអាណិត អាជ្ញាធរយើង ។

ក្នុងពិធីសំណេះសំណាលសួរសុខទុក្ខ សប្បុរសជនបានចូលរួមឧបត្ថម្ភដល់ប្រជាពលរដ្ឋទាំង១៦៥គ្រួសារ និងក្មេងកំព្រា៦០នាក់ នូវ អង្ករ កញ្ចប់អាហារ និងថវិកាមួយចំនួនផងដែរ ៕

ដោយ ៖ សិលា