ភ្នំពេញ ៖ បុរសម្នាក់បានបើករថយន្ត CAMRY ពណ៌ខ្មៅ មួយគ្រឿងយ៉ាងលឿន រួចរេចង្កូតទៅបុករបាំងថ្មចែកទ្រូងផ្លូវពេញទំហឹង បណ្ដាលឲ្យក្រឡាប់ផ្ងារជើងទ្រមេឃ បង្កការភ្ញាក់ផ្អេីលដល់អ្នកដំណេីត កាលពីវេលាម៉ោង១និង៣៥នាទីរសៀល ឈានចូលថ្ងៃទី២៧ ខែមេសា ឆ្នាំ២០២៤ ស្ថិតនៅផ្លូវព្រះមុនីរ៉េត កែងផ្លូវ២១៥ សង្កាត់ផ្សារដើមគរ ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនកេីតហេតុនោះ គេសង្កេតឃេីញរថយន្តបង្កម៉ា CAMRY ពណ៌ខ្មៅ មួយគ្រឿង ធ្វេីដំណេីរចេញពីផ្លូវព្រះមុនីរ៉េត ទិសដៅពីជេីងមកត្បូងយ៉ាងលឿន រួចបានឆ្លងស្ទុបអាងទឹក ស្រាប់តែរេចង្កូតទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យក្រឡាប់ផ្ងារជេីងទ្រមេឃ រងការខូចខាតយ៉ាងដំណំ រីឯរបាំងថ្មវៀតអស់១កង់ ដោយមិនបង្កគ្រោះថ្នាក់ដល់មនុស្សណាម្នាក់ឡេីយ ។
ក្រោយកេីតហេតុភ្លាមៗ គេឃេីញតៃកុងរថយន្តបង្កជាមនុស្សប្រុស បានលូនចេញពីរថយន្ត និងប្រមូលឯកសារជាច្រេីន ព្រមទាំងដោះស្លាកលេខរថយន្តមុខ-ក្រោយ យកចេញទៅបាត់ បន្សល់រថយន្តបង្កទុកនៅកន្លែងកេីតហេតុ ។ បន្ទាប់មក មន្ត្រីនគរបាលប៉ុស្តិ៍រដ្ឋបាលសង្កាត់ផ្សារដេីមគរ បានចុះមកដល់កន្លែងកេីតហេតុ និងសហការជាមួយមន្ត្រីជំនាញចរាចរណ៍នៃស្នងការនគរបាលរាជធានីភ្នំពេញ ធ្វេីការវាស់វែងយករថយន្តបង្កទៅរក្សាទុករង់ចាំការដោះស្រាយពេលក្រោយ ៕ ដោយ ៖ ភារ៉ា ដង្កោ
