ខេត្តព្រះសីហនុ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅព្រឹកថ្ងៃពុធ ៨រោច ខែចេត្រ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី១ ខែឧសភា ឆ្នាំ២០២៤នេះ បានអញ្ជើញសំណេះសំណាលជាមួយមន្ត្រីរាជការ បុគ្គលិក កម្មករ និយោជិតបម្រើការងារនៅកំពង់ផែស្វយ័តក្រុងព្រះសីហនុ។ ក្នុងពិធីសំណេះសំណាលនេះ ធ្វើឡើងក្នុងឱកាសអបអរសាទរខួបអនុស្សាវរីយ៍លើកទី១៣៨ នៃទិវាពលកម្មអន្តរជាតិ ១ ឧសភា ដែលធ្វើឡើងក្រោមប្រធានបទ «សហគ្រាសមួយជាសហគមន៍សុខសាន្តមួយ»។
សូមជម្រាបថា កំពង់ផែស្វយ័តក្រុងព្រះសីហនុ គឺជាបណ្តាញសរសៃឈាមនៃការដឹកជញ្ជូនដ៏សំខាន់មួយរបស់កម្ពុជា។ កំពង់ផែនេះជាច្រកដ៏សំខាន់សម្រាប់ការធ្វើពាណិជ្ជកម្មអន្តរជាតិសម្រាប់កម្ពុជា។ សម្តេចតេជោ ហ៊ុន សែន ក្នុងពេលនៅកាន់តួនាទីជានាយករដ្ឋមន្ត្រីកម្ពុជា សម្តេចតេជោបានយកចិត្តទុកដាក់ខ្ពស់បំផុតចំពោះកំពង់ផែក្នុងព្រះសីហនុនេះ។ សម្តេចតេជោ បានជ្រើសយកថ្ងៃទី១ ខែឧសភា រៀងរាល់ឆ្នាំចុះមកសំណេះសំណាល និងសួរសុខទុក្ខមន្ត្រីរាជការ បុគ្គលិក កម្មករ និយោជិត ដែលបម្រើការងារនៅកំពង់ផែស្វយ័តនេះ។
មកដល់រាជរដ្ឋាភិបាលនីតិកាលថ្មី ដឹកនាំដោយសម្តេចធិបតី ហ៊ុន ម៉ាណែត ក៏នៅតែបន្តការយកចិត្តទុកដាក់ចំពោះកំពង់ផែនេះ ហើយបន្តបេសកកម្មសម្តេចតេជោ ហ៊ុន សែន ដោយចុះមកសំណេះសំណាលជាមួយមន្ត្រីរាជការ បុគ្គលិក កម្មករ និយោជិត នៅក្នុងកំពង់ផែនេះផងដែរ។ តាមរយៈការចុះសំណេះសំណាលរបស់សម្តេចធិបតី បង្ហាញឱ្យឃើញថា សម្តេចធិបតី បន្តស្មារតីសម្តេចតេជោ ហ៊ុន សែន យកចិត្តទុកដាក់ និងគិតគូរខ្ពស់ចំពោះមន្ត្រីរាជការ បុគ្គលិក កម្មករ និយោជិតនៅកំពង់ផែស្វយ័តក្រុងព្រះសីហនុ។
សូមបញ្ជាក់ថា កំពង់ផែស្វយ័តក្រុងព្រះសីហនុ ត្រូវបានសាងសង់ឡើង និងធ្វើប្រតិបត្តិការអាជីវកម្មដំបូងនៅឆ្នាំ១៩៥៦ និងបានចាប់ផ្ដើមបន្តប្រតិបត្តិការអាជីវកម្មជាថ្មីឡើងវិញក្រោយឆ្នាំ១៩៧៩ ដោយប្រតិបត្តិការអាជីវកម្មនៅពេលនោះផ្តើមចេញពីទ្រង់ទ្រាយតូច តាមរយៈការប្រើប្រាស់កម្លាំងកម្មករ សម្ភារបរិក្ខារ ធនធានមនុស្សផ្ទាល់ និងមធ្យោបាយគ្រឿងចក្រធម្មតា ដើម្បីធ្វើការលើកដាក់ទំនិញ កុងតឺន័រ និងបម្រើឱ្យការដឹកជញ្ជូនរបស់ខ្លួន។
ក្រោយមកកំពង់ផែស្វយ័តក្រុងព្រះសីហនុបាន អភិវឌ្ឍសមត្ថភាព តាមរយៈការប្រែក្លាយមធ្យោបាយដឹកជញ្ជូនពីទំនិញវេចខ្ចប់ ទៅជាទំនិញកុងតឺន័រ និងបានសាងសង់ចំណតផែផ្ទុកកុងតឺន័របន្ថែមនៅក្នុងឆ្នាំ២០០២ និងការសាងសង់ពង្រីក ចំណតផែថ្មីៗជាបន្តបន្ទាប់បន្ថែមទៀត ដើម្បីចូលរួមចំណែកគាំទ្រដល់ការរីកចម្រើន និងការអភិវឌ្ឍរបស់ប្រទេសជាតិ។
បច្ចុប្បន្នកំពង់ផែស្វយ័តក្រុងព្រះសីហនុ មានមន្ត្រីរាជការ បុគ្គលិក កម្មករ និយោជិត សរុបចំនួន ១,៣៥៥នាក់ (ស្ត្រី ១៣១នាក់)។ កាលពីឆ្នាំ២០២៣កន្លងទៅនេះ កំពង់ផែ ទទួលបានបរិមាណកុងតឺន័រឆ្លងកាត់កំពង់ផែសរុបមានជិត ៨០ម៉ឺនTEUs កើន ឡើង ៦,៣៥ភាគរយ បើប្រៀបធៀបទៅនឹងរយៈពេលដូចគ្នាឆ្នាំ២០២២ និងចំណូលអាជីវកម្មសរុបជាង ៩៥លានដុល្លារអាម៉េរិក កើនឡើង ៥,៤២%។
ជាមួយគ្នានេះ ចំនួននាវាឆ្លងកាត់កំពង់ផែមានចំនួន ១,៥០៦គ្រឿង កើនឡើង ៤,៤៤ភាគរយ និងចំណុះផ្ទុកនាវា មានរហូតដល់ជាង ១៩លានតោន ដែលមានកំណើនខ្ពស់រហូតដល់ ៣៥,៤២ភាគរយ។ បើគិតក្នុងរយៈពេល ១៤សប្តាហ៍ឆ្នាំ២០២៤ បរិមាណកុងតឺន័រឆ្លងកាត់មានចំនួនប្រមាណ ២៤ម៉ឺនTEUs កើនឡើង ២៣,៤៨ភាគរយ ធៀបនឹងរយៈពេលដូចគ្នាឆ្នាំ២០២៣ ដែលតួលេខនេះបានបង្ហាញពីសន្ទុះប្រកបដោយភាពរឹងមាំសម្រាប់ឆ្នាំ២០២៤។
ជាងនេះទៀត កំពង់ផែស្វយ័តក្រុងព្រះសីហនុ បាននិងកំពុងអភិវឌ្ឍ និងពង្រីកសមត្ថភាពរបស់ខ្លួនជាបន្តបន្ទាប់ តាមរយៈការសាងសង់ហេដ្ឋារចនាសម្ព័ន្ធកំពង់ផែ រួមមាន៖ ការសាងសង់ផែកុងតឺន័រជម្រៅទឹក ១១,៥ម៉ែត្រ, ការសាងសង់ចំណតផែពហុបំណង ជម្រៅទឹក ១៣,៥ម៉ែត្រ, ការសាងសង់ចំណតមូលដ្ឋានផ្គត់ផ្គង់ភស្តុភារសម្រាប់ការរុករកប្រេង, ការបំពាក់ឧបករណ៍ និងមធ្យោបាយលើកដាក់កុងតឺន័រ, ការសាងសង់ទីលានស្តុកកុងតឺន័រ ឃ្លាំងទំនិញ ចំណតរថយន្ត ដឹកកុងតឺន័រ ចំណតផែច្រាំងទំនិញទូទៅ ការសាងសង់តំបន់សេដ្ឋកិច្ចពិសេស។ កាលពីថ្ងៃទី២២ ខែធ្នូ ឆ្នាំ២០២៣ កន្លងទៅនេះ កំពង់ផែស្វយ័តក្រុងព្រះសីហនុ ក៏បានរៀបចំពិធីបើកការដ្ឋាន សាងសង់ចំណតផែកុងតឺន័រទឹកជ្រៅថ្មីជំហានទី១ មានប្រវែង ៣៥០ម៉ែត្រ ជម្រៅទឹក ១៤,៥ ម៉ែត្រ ក្រោមអធិបតីភាពដ៏ខ្ពង់ខ្ពស់សម្តេចធិបតីនាយករដ្ឋមន្ត្រី។ ចំណតផែថ្មីជំហានទី១នេះ មានសមត្ថភាពអាចអនុញ្ញាតឱ្យនាវាប្រមាណជាង ៩៣ភាគរយ ក្នុងតំបន់ចូលចតនៅកំពង់ផែស្វយ័តក្រុងព្រះសីហនុ ដែលបច្ចុប្បន្នមានត្រឹមតែ ១៨ភាគរយប៉ុណ្ណោះអាចចូលចតបាន។ គម្រោងនេះនឹងបញ្ចប់ការសាងសង់នៅក្នុងអំឡុងឆ្នាំ២០២៦។ កំពង់ផែស្វយ័តក្រុងព្រះសីហនុ ក៏គ្រោងនឹងពង្រីកសមត្ថភាពបន្ថែមទៀត តាមរយៈគម្រោងសាងសង់ចំណតផែកុងតឺន័រទឹកជ្រៅថ្មីជំហានទី២ មានប្រវែង ៤០០ម៉ែត្រ ជម្រៅទឹក ១៦,៥ម៉ែត្រ និងចំណតផែកុងតឺន័រទឹកជ្រៅថ្មីជំហានទី៣ មានប្រវែង ៤៣០ម៉ែត្រ ជម្រៅទឹក ១៧,៥ម៉ែត្រ រួមជាមួយនឹងគម្រោងបំពាក់ឧបករណ៍បច្ចេកទេសទំនើបៗផ្សេងៗ ដើម្បីគាំទ្រដល់ប្រតិបត្តិការរបស់កំពង់ផែឱ្យកាន់តែមានប្រសិទ្ធភាពប្រកបដោយស្តង់ដារខ្ពស់៕ដោយ៖តារា
