ភ្នំពេញ÷ អ្នកនាំពាក្យគណៈកម្មាធិការជាតិរៀបចំការ បោះឆ្នោត លោក ហង្ស ពុទ្ធា បានថ្លែងថា ការចេះចែកប័ណ្ណព័ត៌មានអ្នកបោះឆ្នោត ចាប់ផ្តើមពីថ្ងៃទី១១ ដល់ថ្ងៃទី១៥ ខែឧសភា ឆ្នាំ២០២៤ និងគិតមកត្រឹមពេល នេះ ការចែកប័ណ្ណមានចំនួនជាង៥០ភាគរយ បើធៀបនឹងទៅចំនួនអង្គបោះឆ្នោតសរុបប្រមាណ១ម៉ឺននាក់។

ប័ណ្ណព័ត៌មានអ្នកបោះឆ្នោត គឺជាលិខិតជូនដំណឹងដល់អង្គបោះឆ្នោត ដែលប័ណ្ណនេះបានចែងអំពីទិន្នន័យរបស់អ្នកបោះឆ្នោតនីមួយ។ លោក ហង្ស ពុទ្ធា អំពាវនាវដល់អង្គបោះឆ្នោតទាំងអស់ត្រូវត្រៀមឯកសារឱ្យបានត្រឹមត្រូវដែលបម្រើដល់ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹ ក្សាខេត្ត ក្រុមប្រឹក្សាក្រុង ក្រុម ប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ឆ្នាំ២០២៤ ដែលរួមមាន អត្តសញ្ញាណប័ណ្ណសញ្ជាតិខ្មែរ និងឯកសារបញ្ជាក់ពីមុខតំណែងក្រុមប្រឹក្សាឃុំ-សង្កាត់របស់ខ្លួន។

ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ឆ្នាំ២០២៤ នឹងប្រព្រឹត្តទៅនាថ្ងៃទី ២៥ ខែ ឧសភា ឆ្នាំ ២០២៤។ ចំនួនគណបក្សនយោបាយដែលត្រូវចូលរួមបោះឆ្នោតជ្រើសរើសក្រុមប្រឹក្សាសម្រាប់ អាណត្តិ ទី៤ ឆ្នាំ២០២៤នេះ មានសារុបចំនួន៥គឺគណបក្សប្រជាជនកម្ពុជា គណបក្សឆន្ទៈខ្មែរ គណ បក្សកម្លាំងជាតិ, គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ៕