ភ្នំពេញ៖ មានអគ្គិភ័យឆាបឆេះផ្ទះមួយកន្លែងបង្កឲ្យអ្នករត់តុរត់ជាន់ជើងគ្នា បង្កការភ្ញាក់ផ្អើលនៅវេលាម៉ោង១០ និង១៥នាទីព្រឹកថ្ងៃទី២៤ ខែកក្កដា ឆ្នាំ២០១៦ ស្ថិតនៅតាមបណ្ដោយផ្ទះលេខ៦៣ ផ្លូវលេខសុធារស់ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

ករណីគ្រោះអគ្គិភ័យនេះគឺបណ្តាលមកពីទុស្សេខ្សែភ្លើងបង្កជាអណ្តាតភ្លើងឆេះបែបនេះតែម្តង ។ ក្នុងការជួយអន្តរាគមន៍សង្គ្រោះអគ្គិភ័យខាងលើនេះអស់រថយន្ត៥គ្រឿង តែប្រើប្រាស់រថយន្តពន្លត់អគ្គិភ័យសរុប២គ្រឿង ។ ចំណែកលោកយាយម្នាក់ត្រូវបានសមត្ថកិច្ចជួយអន្តរាគមន៍សង្គ្រោះបានទាន់ពេលផងដែរ ដោយលោកយាយនៅក្នុងផ្ទះម្នាក់ឯង។

ប្រភពបានឲ្យដឹងទៀតថា រហូតមកដល់ម៉ោង១០និង៣៩នាទីព្រឹកថ្ងៃដដែល ទើបបាញ់ពន្លត់ភ្លើងទាំងស្រុង តែមិនបណ្ដាលឲ្យមនុស្សណារងរបួសនោះទេ ប៉ុន្តែបានបណ្ដាលឲ្យខូចខាតសម្ភារមួយចំនួនធំ៕

ដោយ៖ ស រស្មី