រហូតមកដល់ព្រឹកថ្ងៃទី២០ ឧសភា ម៉ោងក្នុងស្រុក ព័ត៌មានអំពីជោគវាសនារបស់ប្រធានាធិបតីអុីរ៉ង់ លោក Ebrahim Raisi បន្ទាប់ពីឧទ្ធម្ភាគចក្រដឹកមេដឹកនាំរូបនេះត្រូវចុះចតជាបន្ទាន់នៅតំបន់ក្បែរព្រំដែន Azerbaijan នៅរសៀលថ្ងៃទី១៩ ឧសភា មិនទាន់ត្រូវបានកំណត់នៅឡើយ។
យោងតាមប្រព័ន្ធផ្សព្វផ្សាយអុីរ៉ង់ កងកម្លាំងជួយសង្គ្រោះនៅតែព្យាយាមជម្នះលក្ខខណ្ឌអាកាសធាតុមិនល្អនិងតំបន់ភ្នំដើម្បីទៅដល់ទីតាំងចុះចតរបស់ឧទ្ធម្ភាគចក្រ។
ព័ត៌មានចុងក្រោយដែលផ្តល់ដោយមន្ត្រីអុីរ៉ង់ដល់ប៉ុស្តិ៍ទូរទស្សន៍ Aljazeera នៅព្រឹកព្រលឹមថ្ងៃទី 20 ឧសភា គឺថា ក្រុមជួយសង្គ្រោះមិនទាន់ទៅដល់ទីតាំងនៃឧទ្ធម្ភាគចក្រដឹកប្រធានាធិបតី Ebrahim Raisi ដែលត្រូវចុះចតជាបន្ទាន់នៅរសៀលម្សិលមិញនោះទេ។ ភ្លៀងធ្លាក់ខ្លាំង អ័ព្ទក្រាស់និងដីភ្នំរអិលបានរារាំងល្បឿននៃចលនារបស់បុគ្គលិកសង្គ្រោះ ហើយបានធ្វើឱ្យវាមិនអាចប្រើប្រាស់រថយន្តជំនួយបានទេ។
មុននេះ ប្រភពអុីរ៉ង់មួយចំនួនបាននិយាយថា មេបញ្ជាការកងឆ្មាំបដិវត្តន៍អ៊ិស្លាម (IRGC) របស់អុីរ៉ង់ លោក Hossein Salami និងមន្ត្រីជាន់ខ្ពស់ជាច្រើននៃប្រទេសនេះបានផ្លាស់ទៅខេត្តភាគខាងកើត Azerbaijan ដើម្បីដឹកនាំការងារជួយសង្គ្រោះនិងព្យាបាលករណីនេះ។
យោងតាមប្រព័ន្ធផ្សព្វផ្សាយអុីរ៉ង់ ឧទ្ធម្ភាគចក្រដឹកប្រធានាធិបតី Raisi រដ្ឋមន្ត្រីការបរទេស Hossein Amir-Abdollahian និងមន្ត្រីរដ្ឋាភិបាលអុីរ៉ង់មួយចំនួនទៀតត្រូវចុះចតជាបន្ទាន់នៅក្នុងព្រៃក្បែរព្រំដែន Azerbaijan បន្ទាប់ពីមន្ត្រីទាំងនេះបានបញ្ចប់ដំណើរទស្សនកិច្ចរយៈពេលខ្លីទៅកាន់ប្រទេសជិតខាង។ មូលហេតុដែលឧទ្ធម្ភាគចក្រត្រូវចុះចតបន្ទាន់គឺដោយសារលក្ខខណ្ឌអាកាសធាតុអាក្រក់។
នៅក្នុងប្រតិកម្មផ្លូវការលើកដំបូងចំពោះឧប្បត្តិហេតុនេះ មេដឹកនាំកំពូលរបស់អុីរ៉ង់ Ali Khamenei កាលពីយប់មិញបានបញ្ជាក់ថា ឧប្បត្តិហេតុជាមួយប្រធានាធិបតី Raisi មិនប៉ះពាល់ដល់បញ្ហារបស់ប្រទេសនោះទេ។ មេដឹកនាំកំពូលរបស់អុីរ៉ង់ Ali Khamenei ក៏បាននិយាយថា លោកបានអធិស្ឋានសម្រាប់ប្រធានាធិបតី Raisi ។ នៅក្នុងរដ្ឋធានី Tehran និងទីក្រុងធំៗជាច្រើនក្នុងប្រទេសអុីរ៉ង់ ប្រជាជនរាប់ពាន់នាក់បានស្នាក់នៅពេញមួយយប់ ដើម្បីបួងសួងសុំសេចក្តីសុខជូនប្រធានាធិបតី Raisi។
នៅលើឆាកអន្តរជាតិ ប្រធានាធិបតីទួរគី Tayyip Erdogan បានសម្តែងការព្រួយបារម្ភយ៉ាងខ្លាំងនៅពេលទទួលបានព័ត៌មានអំពីឧទ្ធម្ភាគចក្រដឹកប្រធានាធិបតីអុីរ៉ង់មានបញ្ហានិងត្រូវចុះចតជាបន្ទាន់។ នៅលើបណ្តាញសង្គម X ប្រធានាធិបតី Erdogan បានបញ្ជាក់ថា Türkiye នៅតែមានទំនាក់ទំនងជិតស្និទ្ធជាមួយមន្ត្រីអុីរ៉ង់ ហើយត្រៀមខ្លួនជាស្រេចក្នុងការផ្តល់ការគាំទ្រចាំបាច់ទាំងអស់ដល់ប្រទេសជិតខាងជាបងប្អូន៕ ដោយធីរីណា
រូបថត: CNN
