ខេត្តកណ្តាល៖ បុរសម្នាក់មានមុខរបរជាកម្មកររោងចក្រកាត់ដេរត្រូវបានសមត្ថកិច្ចនគរបាលស្រុកកណ្តាលស្ទឹងចាប់ខ្លួន ដើម្បីកសាងសំណុំរឿងចាត់ការតាមច្បាប់ បន្ទាប់ពីឆែកឆេររកឃើញថាបុរសរូបនេះមានរក្សាទុកគ្រឿងញៀនមេតំហ្វេតាមីន១កញ្ចប់នៅជាប់ខ្លួន ។

ប្រតិបត្តិការបង្រ្កាបឃាត់ខ្លួនជនសង្ស័យខាងលើនេះធ្វើឡើង កាលពីវេលាម៉ោង៤ និង៣០រសៀលថ្ងៃទី២៥ ខែកក្កដា ឆ្នាំ២០១៦ ស្ថិតក្នុងភូមិស្រែគោក ឃុំអន្លង់រមៀត ស្រុកកណ្តាលស្ទឹង ។

មន្ត្រីនគរបាលស្រុកកកណ្តាលស្ទឹងបានឲ្យដឹងថា ជនសង្ស័យដែលត្រូវបានចាប់ខ្លួននោះឈ្មោះ លៀង កុសល់ ភេទប្រុស អាយុ២៥ឆ្នាំ ជនជាតិខ្មែរ មុខរបរ ជាកម្មកររោងចក្រកាត់ដេរ មានទីលំនៅភូមិខាងត្បូង ឃុំអន្លង់រមៀត ស្រុកកណ្តាលស្ទឹង ។ ក្នុងប្រតិបត្តិការឃាត់ខ្លួនជនសង្ស័យខាងលើនេះ សមត្ថកិច្ចនគរបាលបានរឹបអូសវត្ថុតាងរួមមាន៖ ថ្នាំញៀនប្រភេទមេតំហ្វេតាមីន ហៅម៉ាទឹកកក១កញ្ចប់, ទូរស័ព្ទដៃម៉ាកអាយហ្វូនហ្វាយ១គ្រឿង, កាបូបដាក់លុយ១ និងម៉ូតូ១គ្រឿង ម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០០៩ ពាក់ស្លាកលេខកណ្ដាល 1J–6172 ។

ប្រភពដដែលបានបន្តថា នៅមុនពេលកើតហេតុសមត្ថកិច្ចនគរបាលស្រុកសហការជាមួយនគរបាលប៉ុស្តិ៍រដ្ឋបាលចេញល្បាតក្នុងភូមិសាស្ត្រឃុំអន្លង់រមៀត ខណៈល្បាតដល់ចំណុចស្រែគោកក៏បានប្រទះឃើញមុខសញ្ញាខាងលើនេះជិះម៉ូតូគួរឲ្យសង្ស័យ ។ ភ្លាមៗនោះសមត្ថកិច្ចបានឲ្យឈប់សុំធ្វើការឆែកឆេរ រហូតរកឃើញមានវត្ថុតាងជាក់ស្តែងឃាត់ខ្លួនជនសង្ស័យវាយខ្នោះបញ្ជូនទៅកាន់អធិការដ្ឋានននគរបាលស្រុកកណ្តាលស្ទឹង ដើម្បីកសាងសំណុំរឿងចាត់ការតាមច្បាប់ ៕

ដោយ៖ ស្អាងជ័យ