ភ្នំពេញ ៖ កម្លាំងអធិការដ្ឋាននគរបាលខណ្ឌសែនសុខ ចុះធ្វើរដ្ឋបាលទីតាំងសង្ស័យពាក់ព័ន្ធនឹងគ្រឿងញៀនឃាត់មនុស្ស២០នាក់ ចាប់យកសម្ភារប្រើប្រាស់មួយចំនួន។

ករណីចុះរដ្ឋបាលនេះធ្វើឡើងកាលពីវេលាម៉ោង១០និង៣០នាទីព្រឹកថ្ងៃទី២៧ ខែកក្កដា ឆ្នាំ២០១៦ នៅក្រុមទី១០ និង១១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ។

លោកវរសេនីយ៍ឯក ម៉ក់ ហុង អធិការនគរបាលខណ្ឌបានឲ្យដឹងថា ការចុះធ្វើរដ្ឋបាលនេះដោយមានការណែនាំបញ្ជាផ្ទាល់ពីលោកឧត្តមសេនីយ៍ស្នងការរាជធានីភ្នំពេញឲ្យចុះបង្ក្រាបរាល់បទល្មើសក្នុងមូលដ្ឋានរបស់ខ្លួនជាពិសេសករណីគ្រឿងញៀននៅតំបន់ភូមិត្រពាំងឈូកនេះ។ ហើយដោយមានការសម្របសម្រួលពីលោកព្រះរាជអាជ្ញារង ងិន ពេជ្រ លោកក៏បានដឹកនាំកម្លាំងចុះធ្វើរដ្ឋបាលនៅទីតាំងខាងលើជាលទ្ធផល ឃាត់ខ្លួនមនុស្ស ២០នាក់និងចាប់យកឧបករណ៍សេពគ្រឿងញៀនមួយចំនួន។

បច្ចុប្បន្នមនុស្សទាំង២០នាក់កំពុងឃាត់ខ្លួននៅអធិការដ្ឋានខណ្ឌសែនសុខនិងសហការណ៍ជាមួយការិយាល័យជំនាញ ដើម្បីធ្វើតេស្តរកសារធាតុញៀន អនុវត្តន៍តាមនីតិវិធី៕

ដោយ៖ តុង សីហា