ភ្នំពេញ៖ ជនសង្ស័យ២នាក់ដែលជាមុខសញ្ញាគាស់បន្ទប់ជួលត្រូវបានម្ចាស់តាមទាន់ចាប់ប្រគល់ឲ្យសមត្ថកិច្ចខណៈកំពុងធ្វើសកម្មភាព កាលពីវេលាម៉ោង៨ព្រឹកថ្ងៃទី២៨ ខែកក្កដា ឆ្នាំ២០១៦ នៅជាប់របងរោងចក្រក្រុមហ៊ុនហុងដា សង្កាត់ចោមចៅ ខណ្ឌពោធិ៍សែនជ័យ។

ជនសង្ស័យទាំង២នាក់ទី១ឈ្មោះសុខ ដាវី ភេទស្រី អាយុ១៧ឆ្នាំ មុខរបមិនពិតប្រាកដ និងទី២ឈ្មោះ ផុតសុធា ភេទប្រុស អាយុ២៤ឆ្នាំ មុខរបនិងទីលំនៅមិនពិតប្រដក។

តាមសម្ដីម្ចាស់ផ្ទះជួលឈ្មោះហែមផល ឡើន អាយុ៤១ឆ្នាំ បានឲ្យដឹងថា នៅមុនពេលកើតហេតុគេបានឃើញនារីជាជនសង្ស័យម្នាក់បានឆ្កិះសោបន្ទប់ចូលទៅសំងំនៅខាងក្នុងខណៈកំពុងធ្វើសកម្មភាពរុះរើស្រាប់តែម្ចាស់បន្ទប់មកទាន់ទើបចាប់ប្រគល់ឲ្យសមត្ថកិច្ច។

សមត្ថកិច្ចបានឲ្យដឹងថា ក្រោយពីធ្វើការសាកសួរនារីជាជនសង្ស័យភ្លាមនោះក៏មានយុវជនម្នាក់មករកនារីជាជនសង្ស័យនៅទីស្នាក់ការប៉ុស្តិ៍ចោមចៅ ដោយបាននិយាយថានាងជាសង្សារ។

តាមសម្ដីម្ចាស់ផ្ទះជួលបានបន្តទៀតថាជនសង្ស័យទាំង២នាក់ធ្លាប់មកធ្វើសកម្មភាពគាស់ផ្ទះជួលគាត់ជាច្រើនដងមកហើយលុះមកដល់ថ្ងៃកើតហេតុពួកគេក៏បានមកធ្វើសកម្មភាពម្តងទៀតទើបឃើញចាប់ឃាត់ខ្លួនប្រគល់ឲ្យសមត្ថកិច្ចតែម្តង។

នៅចំពោះមុខសមត្ថកិច្ចពួកគេបានសារភាពថា នៅមុនពេលធ្វើសកម្មភាពជនសង្ស័យជាបុរសបានឌុបនារីជាសង្សារទៅដាក់កន្លែងកើតហេតុដើម្បីធ្វើសកម្មភាព។

បច្ចុប្បន្នជនសង្ស័យត្រូវបានសមត្ថកិច្ចធ្វើការសាកសួរនិងការសាងសំណុំរឿងបញ្ជូនទៅអធិការដ្ឋានគរបាលខណ្ឌដើម្បីចាត់ការបន្ត៕

ដោយ៖ សុខាសែនជ័យ