ខណៈដែលគ្រូបង្វឹករបស់ក្លិបធំៗនៅ តំបន់អឺរ៉ុបកំពុងតែមមាញឹកទិញកីឡាករ មកពង្រឹងក្រុមរបស់ខ្លួនសម្រាប់រដូវកាលថ្មី លោក Carlo Ancelotti គ្រូបង្វឹករបស់ក្រុម Bayern Munich បានបញ្ជាក់ថា ក្រុមរបស់គាត់គឺគ្រប់គ្រាន់ហើយមិនចាំបាច់ទិញ កីឡាករបន្ថែមឡើយ ។

ទោះបីជាក្រុម Bayern Munich បាន លក់កីឡាករ Mario Gotze និង Sebastian Rode ក៏ដោយ ក៏គ្រូបង្វឹកសញ្ជាតិអុីតាលី Carlo Ancelotti នៅតែយល់ថាក្រុមរបស់គាត់បច្ចុប្បន្នអាចឈ្នះជើងឯកអាល្លឺម៉ង់ជាលើកទី៥ជាប់គ្នាទៀតនៅរដូវកាលក្រោយនិងប្រហែលជាលើកពានរង្វាន់ទ្វីបអឺរ៉ុប Champions League ទៀតផង ។

អតីតគ្រូបង្វឹករបស់ក្លិប AC Milan, Real Madrid និងតោខៀវ Chelsea រូបនេះបានថ្លែងនៅក្នុងសន្និសីទកាសែតមួយថា “ខ្ញុំពេញចិត្តនឹងក្រុមនេះហើយ។ ខ្ញុំគិតថាយើងមានកីឡាករនៅគ្រប់ផ្នែកទាំងអស់ ហើយមិនចាំបាច់ត្រូវការកីឡាករបន្ថែមទៀតឡើយដោយខ្ញុំយល់ថាពួកគឺជាក្រុមល្អទៅហើយ”។

ប៉ុន្តែចាប់តាំងពីគាត់ចូលមកដឹកនាំ ក្រុម Bayern Munich លោក Carlo Ancelotti បានទិញខ្សែបម្រើវ័យ១៨ឆ្នាំរបស់ព័រទុយហ្គាល់ Renato Sanches ពីក្លិប Benfica ហើយថែមទាំងនាំយកខ្សែការពារកណ្តាលសញ្ជាតិអាល្លឺម៉ង់ Mats Hummels ពីក្រុម Borussia Dortmund ទៀតផង ។

លោក Carlo Ancelotti បានថ្លែងបន្ត ទៀតថា “វត្តមានរបស់ខ្សែប្រយុទ្ធប៉ូឡូញ Robert Lewandowski គឺសំខាន់ខ្លាំង ណាស់។ ខ្ញុំបានឃើញគាត់លេងបាល់ជាច្រើនលើកច្រើនសា ហើយគាត់ក៏ស៊ុតបាល់ បញ្ចូលទីបានច្រើនផងដែរ។ គាត់គឺជាខ្សែប្រយុទ្ធដ៏អស្ចារ្យមួយរូប ហើយយើងត្រូវការកីឡាករដូចជារូបគាត់ ហេតុដូចនេះយើង ពិតជាសប្បាយរីករាយដែលគាត់នៅជា មួយយើង”៕

ដោយ៖ ដេវីត