នាឱកាសនោះដែរលោកស្រីឧបនាយករដ្ឋមន្ត្រី ម៉ែន សំអន ក៏បានមានប្រសាសន៍ថា ៖ អង្គការខាណាបានបន្តរួមចំណែកលើកកម្ពស់វិស័យសុខាភិបាល និងជួយដោះស្រាយបញ្ហាសុខភាពជាអាទិភាពដទៃផ្សេងទៀត របស់ប្រព័ន្ធ សុខាភិបាលសាធារណៈ រួមមានសុខភាពមាតា និងទារក សុខភាពបន្តពូជ និងសុខភាពផ្លូវភេទ និងផែនការគ្រួសារ ការប្រយុទ្ធនិងលុបបំបាត់ជំងឺរបេង គ្រុនចាញ់ និងប្រភេទជំងឺឆ្លង និងជំងឺមិនឆ្លងដទៃផ្សេងទៀត រួមមានជំងឺរលាកថ្លើមប្រភេទបេ និងសេ ជំងឺលើសឈាម ជំងឺទឹកនោមផ្អែម ដែលនៅតែជាឃាតករដ៏អាថកំបាំង និងបន្តសម្លាប់ប្រជាពលរដ្ឋកម្ពុជារាប់សិបនាក់ជារៀងរាល់ឆ្នាំ។

លោកស្រីក៏បានថ្លែងអំណរគុណចំពោះដៃគូអភិវឌ្ឍន៍ សហគមន៍ ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) រដ្ឋាភិបាលសហរដ្ឋអាមេរិក និងពលរដ្ឋអាមេរិកដែលបានជួយជ្រោមជ្រែង និងរួមចំណែកដល់ការផ្តល់ជំនួយបច្ចេកទេសនិងជំនួយហិរញ្ញវត្ថុ ក្នុងការលើកស្ទួយវិស័យសុខាភិបាលសាធារណៈ និងវិស័យជាអាទិភាពនានារបស់រាជរដ្ឋាភិបាលកម្ពុជា ដែលឆ្លើយតបទៅនឹងតម្រូវការរបស់ប្រជាពលរដ្ឋកម្ពុជា។ ការចូលរួមចំណែករបស់អ្នកពាក់ព័ន្ធទាំងអស់ រួមទាំងការចូលរួមរបស់ប្រជាពលរដ្ឋ ជាពិសេសការងារពហុវិស័យដែលត្រូវបានប្រើប្រាស់ក្នុងការឆ្លើយតបចំពោះមេរោគ អេដស៍ និងជំងឺអេដស៍បានធ្វើឱ្យកម្ពុជាយើងក្លាយជាប្រទេសគម្រូក្នុងតំបន់ និងក្នុងពិភពលោក ដោយបានកាត់បន្ថយការរីករាលដាល និងអត្រាប្រេវ៉ាឡង់មេរោគអេដស៍ក្នុងចំណោមប្រជាពលរដ្ឋពេញវ័យ។

ផែនការយុទ្ធសាស្ត្រ ៥ឆ្នាំ សម្រាប់អនុវត្តនាពេលខាងមុខរបស់អង្គការខាណាមានគោលដៅសំខាន់ៗចំនួន ៤ រួមមាន៖! ១) លុបបំបាត់ការឆ្លងមេរោគអេដស៍ថ្មី ពង្រឹងប្រព័ន្ធសុខាភិបាល និងសម្រេចឲ្យបានការទទួលសេវាសុខភាពជាសាកល ២) កសាងសមត្ថភាពរបស់សហគមន៌ តាមរយៈការអភិវឌ្ឍប្រព័ន្ធស្ថាបនានិងប្រព័ន្ធសហគមន៍ដែលមាននិរន្តរភាព ៣) ពង្រឹងសមត្ថភាពស្ថាប័ន និងសមត្ថភាពបច្ចេកទេសអង្គការខាណា និងសង្គមស៊ីវិល ៤)លើកកំពស់ភាពផ្សេងៗគ្នា សិទ្ធិ និងសមភាពយ៉េនឌ័រ៕