យន្តហោះបានធ្លាក់តាមផ្លូវទៅកាន់អាកាសយានដ្ឋាន Vnukovo ក្នុងទីក្រុងមូស្គូ បន្ទាប់ពីហោះចេញពីទីលានជួសជុលរបស់រោងចក្រយន្តហោះនៅទីក្រុង Lukhovitsy ចម្ងាយ 110 គីឡូម៉ែត្រភាគអាគ្នេយ៍នៃរដ្ឋធានីរុស្ស៊ី។

កាលពីថ្ងៃទី 12 ខែកក្កដា យន្តហោះពាណិជ្ជកម្មរុស្ស៊ី ដែលមិនផ្ទុកអ្នកដំណើរបានធ្លាក់នៅជិតទីក្រុងមូស្គូ ដោយបានសម្លាប់សមាជិកអាកាសយានិកទាំង 3 នាក់។ ក្រសួងស្ថានការណ៍គ្រាអាសន្នរបស់រុស្ស៊ីបានបញ្ជាក់ថា យន្តហោះបានធ្លាក់ក្នុងព្រៃក្បែរទីក្រុង Kolomna ហើយមិនមានអ្នករងរបួសក្នុងចំណោមអ្នកនៅលើដីនោះទេ។
Sukhoi Superjet 100 ដែលបានរៀបរាប់ខាងលើគឺជាកម្មសិទ្ធិរបស់ក្រុមហ៊ុន Gazprom Avia ដែលជាក្រុមហ៊ុនដឹកជញ្ជូនគ្រប់គ្រងដោយសាជីវកម្មឧស្ម័ន Gazprom ។
គណៈកម្មាធិការស៊ើបអង្កេតសហព័ន្ធរុស្ស៊ីកំពុងស៊ើបអង្កេតមូលហេតុនៃគ្រោះថ្នាក់នេះ។
យន្តហោះ Superjet 100 ផលិតដោយរុស្ស៊ី ឬហៅម្យ៉ាងទៀតថា SSJ100 ត្រូវបានមន្ត្រីរុស្ស៊ីសរសើរថាជាសមិទ្ធផលដ៏អស្ចារ្យនៃឧស្សាហកម្មអាកាសចរណ៍ស៊ីវិលរបស់ប្រទេស។
Superjet 100 ត្រូវបានដាក់ឱ្យដំណើរការក្នុងឆ្នាំ 2011 ប៉ុន្តែជារឿយៗមានបញ្ហាដោយសារហេតុផលផ្សេងៗគ្នា ខណៈពេលដែលតម្លៃថែទាំគឺខ្ពស់ណាស់។
កាលពីខែឧសភា ឆ្នាំ 2012 យន្តហោះ Sukhoi Superjet 100 បានធ្លាក់ចូលទៅក្នុងភ្នំភ្លើង អំឡុងពេលហោះហើរនៅប្រទេសឥណ្ឌូនេស៊ី ដោយបានសម្លាប់មនុស្សទាំងអស់ 45 នាក់នៅលើយន្តហោះ។
លទ្ធផលស៊ើបអង្កេតបានបង្ហាញថា ក្រុមអាកាសយានិកមិនបានដឹងពីភ្នំភ្លើងនេះទេ ហើយមិនអើពើនឹងសញ្ញាពីប្រព័ន្ធព្រមាននៅពេលហោះហើរក្នុងពពកក្រាស់៕ ដោយធីរីណា

រូប​ថត​: AP