ប៉ុស្តិ៍ប៉ូលិស Lumphini ប្រទេសថៃបានសាកសួរឈ្មោះ Phan Ngoc Vu អាយុ 35 ឆ្នាំ ដែលជាមគ្គុទ្ទេសក៍ទេសចរណ៍របស់ក្រុមជនជាតិវៀតណាមចំនួន 6 នាក់ដែលបានស្លាប់នៅទីក្រុងបាងកក និងស្គាល់ជនរងគ្រោះម្នាក់។

យោងតាមសារព័ត៌មាន Bangkok Post និង Khaosod លោក Vu បាននិយាយថា លោកបានស្គាល់លោកស្រី Nguyen Thi Phuong Lan ពីមុនមក ហើយត្រូវបានស្ត្រីរូបនេះសុំទិញថ្នាំពស់ ដែលជាថ្នាំសម្រាប់ព្យាបាលការឈឺសន្លាក់ ក្នុងតម្លៃ ១១,០០០ បាតចន្លោះពីថ្ងៃទី ៣ ដល់ថ្ងៃទី ៧ ខែ ឧសភា។ លោក Vu បាននិយាយថា គាត់ត្រូវបានគេសុំទិញ “ថ្នាំពស់ម៉ាកលេខ ៧” ជាថ្នាំប៉ូវកម្លាំងពេញនិយមពីប្រជាជនវៀតណាម ហើយលក់នៅតាមហាងនានាក្នុងតំបន់ Lat Krabang ក្រុងបាងកក។
យោងតាមសក្ខីកម្មរបស់ Vu គាត់បានទាក់ទងមគ្គុទ្ទេសក៍ទេសចរណ៍ម្នាក់ទៀតឈ្មោះ “ហូ” ដើម្បីទាក់ទងនាង Lan និងបញ្ជូនថ្នាំទៅសណ្ឋាគារ។ ក្រុមអ្នកស៊ើបអង្កេតកំពុងពិនិត្យមើលវីដេអូដែលបានថតចេញពីកាមេរ៉ាសុវត្ថិភាពដើម្បីកំណត់ទីតាំងនៃមគ្គុទ្ទេសក៍ទេសចរណ៍ទីពីរនេះ។
ប្រភពថៃបាននិយាយថា៖ «ប្រសិនបើលោកស្រី Nguyen Thi Phuong Lan ជាអ្នកទិញថ្នាំពុលម្នាក់ គាត់នឹងក្លាយជាជនសង្ស័យម្នាក់ទៀតក្នុងករណីពុលនេះ»។
ភ្នាក់ងារស៊ើបអង្កេតក៏បានសួរចម្លើយលោក Hung ដែលជាប្តីរបស់លោកស្រី Lan អស់រយៈពេល 5 ម៉ោង។ លោក Hung បានមានប្រសាសន៍ថា លោកបានបែកគ្នាពីលោកស្រី Lan ហើយឥឡូវនេះពួកគេរស់នៅដោយឡែកពីគ្នាដោយលោកមិនបានដឹងពីមុខរបររបស់ភរិយាលោកទេ។ ទោះបីជាយ៉ាងណា មុនពេលអ្នកស្រី ឡាន ស្លាប់ គាត់បានទូរស័ព្ទជាវីដេអូជាមួយប្តី។
យោងតាមភ្នាក់ងារស៊ើបអង្កេតរបស់ថៃបានឱ្យដឹងថា ប្តីរបស់នាងឡានជាពាណិជ្ជករបានទូរស័ព្ទទៅមគ្គុទ្ទេសក៍ទេសចរណ៍នោះហើយបានសុំដោះដូរលុយឱ្យបងស្រីរបស់ប្រពន្ធគាត់ដែលបន្ទាប់មកបានត្រឡប់ទៅប្រទេសវៀតណាមវិញនៅថ្ងៃទី ១០ ខែកក្កដា។
លោក Vu បានប្តូរប្រាក់ចំនួន 70 លានដុង ប្រហែល 90,000 បាត ហើយបានប្រគល់ប្រាក់នេះទៅប្អូនស្រីរបស់លោកស្រី Lan ដែលបាននៅជាមួយ Dang Van Hung ដែលជាមនុស្សម្នាក់ក្នុងចំណោមមនុស្ស 6 នាក់ដែលបានស្លាប់នៅពេលក្រោយ។ ប្រភពបន្តថា ក្រោយពីទទួលបានលុយហើយ ប្អូនស្រីរបស់នាង Lan បានត្រឡប់ទៅក្រុង Da Nang វិញនៅថ្ងៃបន្ទាប់។
កាលពីថ្ងៃទី ១៦ ខែកក្កដា ប៉ូលិសថៃបានប្រកាសរកឃើញភ្ញៀវចំនួន ៦ នាក់ ក្នុងនោះមានជនជាតិវៀតណាម ៤ នាក់ និងជនជាតិអាមេរិក ២ នាក់បានស្លាប់នៅក្នុងបន្ទប់សណ្ឋាគារមួយក្នុងទីក្រុងបាងកក។ មូលហេតុនៃការស្លាប់ត្រូវបានគេសន្និដ្ឋានថាជាការពុលស្រា៕ ដោយធីរីណា