ខេត្តស្វាយរៀង៖ សមត្ថកិច្ច បញ្ជូនជនសង្ស័យប្រុស ស្រីចំនួន៥នាក់ ទៅតុលាការពាក់ព័ន្ធករណីរក្សាទុកឬជួញដូរដោយខុសច្បាប់នូវសារធាតុញៀន នៅថ្ងៃទី២០ ខែកក្កដា ឆ្នាំ២០២៤។
យោងតាមសមត្ថកិច្ច បានឲ្យដឹងថា នៅវេលាម៉ោង០១ ថ្ងៃទី១៧ ខែកក្កដា ឆ្នាំ២០២៤ រហូតដល់ម៉ោង១០យប់ និង០៥នាទី ថ្ងៃទី១៧ ខែកក្កដា ឆ្នាំ២០២៤ ដោយមានការចង្អុលបង្ហាញពីលោក វរសេនីយ៍ឯក ឡឹក ចំរើន មេបញ្ជាការស្ដីទីកងរាជអាវុធហត្ថខេត្តស្វាយរៀង និងដោយមានការដឹកនាំសម្របសម្រួលនីតិវិធី ពីលោក ឈីវ អុិចគង់ ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង បានបញ្ជាឱ្យកម្លាំងមន្ទីរស្រាវជ្រាវ និងបង្រ្កាបបទល្មើស កងរាជអាវុធហត្ថខេត្ត សហការជាមួយកម្លាំងមូលដ្ឋានកងរាជអាវុធហត្ថក្រុងបាវិត និងកម្លាំងមូលដ្ឋានកងរាជអាវុធហត្ថស្រុកចន្រ្ទា ដឹកនាំដោយលោក វរសេនីយ៍ឯក ស្រី វុត្ថា មេបញ្ជាការងទទួលជំនាញ បានធ្វើការបង្រ្កាបករណីរក្សាទុកឬជួញដូរ និងប្រើប្រាស់ដោយខុសច្បាប់នូវសារធាតុញៀន នៅចំណុចបុរី CK ផ្ទះល្វែងលេខF06 ស្ថិតនៅភូមិតាបឹប សង្កាត់បាវិត ក្រុងបាវិត ខេត្តស្វាយរៀង៊
ប្រភពបន្តថា រហូតដល់ម៉ោង១០និង០៥នាទី យប់ថ្ងៃទី ១៧ ខែកក្កដា ឆ្នាំ២០២៤ នៅចំណុចផ្ទះសំណាក់ថៃអាង២ ជាន់ទី៤ បន្ទប់លេខ៨២ ស្ថិតនៅភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង បានឃាត់ខ្លួនជនសង្ស័យចំនួន៥នាក់ ស្រីចំនួន១នាក់ ប្រុសចំនួន៤នាក់។
ក្នុងនោះសមត្ថកិច្ច បានដកហូតវត្ថុតាងសរុបរួមមាន៖ ម្សៅកញ្ចប់ពណ៌ក្រហម(សញ្ញារូបសេះ) ចំនួន២៤៣ កញ្ចប់ មានទម្ងន់ ១៨៣៥,៥ក្រាម ប្រភេទ អិចស្រ្តាស៊ី, ក្រាមពណ៌សចំនួន ៨កញ្ចប់ មានទម្ងន់ ៩២,៨០ក្រាម ប្រភេទ អិចស្រ្តាស៊ី, ក្រាមម៉ត់ពណ៌សថ្លាចំនួន៣កញ្ចប់, ថ្នាំគ្រាប់ពណ៌ក្រហមចំនួន៤កញ្ចប់ មានទម្ងន់ ១៥,៩ក្រាម ប្រភេទ អិចស្រ្តាស៊ី, ម្សៅម៉ត់ពណ៌សចំនួន៦កញ្ចប់ មានទម្ងន់៣៤,១០ក្រាម ប្រភេទមេតំហ្វេតតាមីន, ទូរស័ព្ទចំនួន១១គ្រឿង, ម៉ូតូ ចំនួន១គ្រឿង, ជញ្ចីងសម្រាប់ថ្លឹងគ្រឿងញៀនចំនួន៣ គ្រឿង
,អត្តសញ្ញាណប័ណ្ណវៀតណាមចំនួន ២សន្លឹក, សម្ភារៈប្រើប្រាស់ និងសម្ភារៈវេចខ្ចប់គ្រឿងមួយចំនួន៕
