ខេត្តបន្ទាយមានជ័យ៖ សិស្សសាលា៣នាក់ ក្នុងចំណោមម្នាក់ស្លាប់ដោយឡែក២នាក់ទៀតរងរបួស ខណៈបើកម៉ូតូរអិលដួលមុខរថយន្តក្រឡុកស៊ីម៉ងត៍ រសៀលថ្ងៃទី៣១ ខែកក្តដា ឆ្នាំ២០២៤ ស្ថិតភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត។
សមត្ថកិច្ចជំនាញប្រាប់ថា នៅពេលមុនកើតហេតុគ្រោះថ្នាក់ចរាចរណ៍មានសិស្សសាលាចំនួន៣នាក់ជាបានជិះម៉ូតូម៉ាក់ស្កូពីពាក់ផ្លាកលេខបន្ទាយមានជ័យ1AA-4604 បើកបរតាមបណ្តោយផ្លូវបេតុងទិសដៅពីកើតមកលិច ដល់ចំណុចកើតហេតុឡើងជែងរថយន្តក្រឡុកស៊ីម៉ងត៍ ពាក់ផ្លាកលេខបន្ទាយមានជ័យ5A-0039បើកបរស្របទិសគ្នា លុះជែងផុតរថយន្ត ម៉ូតូរអិលភក់ដួលត្រូវរថយន្តបើកមកពីក្រោយបុកកិនចំក្បាលស្លាប់ម្នាក់ ដោយឡែក២នាក់ទៀត រងរបួសស្រាល។
សមត្ថកិច្ចបន្តថា នៅកន្លែងកើតហេតុគេឃើញមន្ត្រីនគរបាលចរាចរណ៍ផ្លូវគោកក្រុងប៉ោយប៉ែតបានមកដល់ចំណុចខាងលើពិនិត្យវាស់វែងបានប្រាប់ថាមូលហេតុគ្រោះចរាចរណ៍កើតឡើងដោយសារយុវជន៣នាក់ជាសិស្សសាលាមានអាយុ១៥ទៅ១៦ឆ្នាំបានជិះម៉ូតូត្រឡប់ពីសាលាមកផ្ទះហើយបើកបរម៉ូតូឡើងជែងរថយន្តក្រឡុកស៊ីម៉ងត៍ក្នុងស្ថានភាពគ្រោះថ្នាក់បណ្តាលរអិលដួលត្រូវបានរថយន្តមកពីក្រោយបុកកិនស្លាប់ម្នាក់នៅនឹងកន្លែងម្នាក់ចំណែក ២នាក់ទៀតរបួស ស្រាល រីឯអ្នកបើកបររថយន្តរត់គេចខ្លួនបាត់។ ក្រោយពិនិត្យវាស់វែងហើយជនរងគ្រោះដែលស្លាប់ប្រគល់ជូនសាច់ញាតិទទួលយកទៅធ្វើបុណ្យតាមប្រពៃណី ចំពោះ រថយន្តបង្កនិងម៉ូតូរងគ្រោះត្រូវបានយកទៅរក្សាទុកនៅអធិការដ្ឋាននគរបាលក្រុងប៉ោយប៉ែតដើម្បីដោះស្រាយតាមច្បាប់៕វណ្ណា