ភ្នំពេញ ៖ ជនសង្ស័យមួយក្រុមមានគ្នាប្រមាណជិត១០នាក់ ធ្វើសកម្មភាពធាក់ផ្តួលប្លន់យកម៉ូតូឡេតពីយុវជនម្នាក់បានសម្រេច ហើយគេចខ្លួនបាត់ស្រមោល កាលពីវេលាម៉ោង១២និង៤០នាទីរំលងអាធ្រាត្រឈានចូលថ្ងៃទី០២ ខែសីហា ឆ្នាំ២០១៦ នៅចំណុចមុខផ្ទះសំណាក់តុងសៀន តាមបណ្តោយផ្លូវលេខ៣៧១ ស្ថិតក្នុងភូមិត្នោតជ្រុំ៤ សង្កាត់បឹងទំពុន ខណ្ឌមានជ័យ ។

យុវជនរងគ្រោះមានឈ្មោះ ហួង គុនថុន អាយុ២៣ឆ្នាំ មានមុខរបរជាជាងបាញ់ថ្នាំ បច្ចុប្បន្នស្នាក់នៅផ្ទះជួលក្នុងភូមិម័ល សង្កាត់ដង្កោ ខណ្ឌដង្កោ ចំណែកម៉ូតូដែលប្លន់យកទៅបាត់ម៉ាក ស៊ុយសុគីឡេត ពាក់ស្លាកលេខ ភ្នំពេញ 1FG-1023 ។

បើតាមសម្តីរៀបរាប់ពីជនរងគ្រោះបានឲ្យដឹងថា នៅមុនពេលកើតហេតុរូបគេរួមជាមួយនិងមិត្តភក្រ្តបាននាំគ្នាជិះម៉ូតូដើរលេងក្នុងមជ្ឍមណ្ឌលកោះពេជ្រ ហើយនៅវេលាម៉ោងកើតហេតុគេក៏បានបំបែកផ្លូវគ្នាដោយជិះទៅផ្ទះរៀងៗខ្លួន ដោយជិះតាមបណ្តោយផ្លូវលេខ៣៧១ បំណងត្រឡប់ទៅផ្ទះជួលវិញនៅម្តុំចំការដូង ខណៈពេលមកដល់កន្លែងកើតហេតុស្រាប់តែមានជនសង្ស័យមួយក្រុមជិះម៉ូតូ៣គ្រឿង មានគ្នាប្រមាណជិត១០នាក់ បានជិះមកគៀរឲ្យចូលគៀនហើយធាក់បណ្ដាលឲ្យដួល រួចនាំគ្នាលើកយកម៉ូតូទៅបាត់តែម្ដង ។

ក្រោយកើតហេតុសមត្ថកិច្ចមូលដ្ឋានបានត្រឹមតែមកដឹកយកជនរងគ្រោះទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលបឹងទំពុនតែប៉ុណ្ណោះ ៕

ដោយ៖ជីម ភារ៉ា ដង្កោ