ភ្នំពេញ៖ កម្លាំងអន្តរាគមន៍ក្រុងចុះល្បាតក្នុងទឹកដីខណ្ឌពោធិ៍សែនជ័យ បានធ្វើការឃាត់ខ្លួនជនសង្ស័យ២នាក់ ២ករណីផ្សេងគ្នា ជនសង្ស័យទី១ រក្សាទុកនូរសារធាតុញៀនម៉ាទឹកកក១កញ្ចប់តូច និងជនសង្ស័យទី២ ជាមុខសញ្ញាឆ្កិះសោបន្ទប់លួចទ្រព្យសម្បត្តិ ក្នុងរយៈពេលតែមួយ។

ករណីនេះកើតឡើងនៅវេលាម៉ោង១២ និង៣០នាទីយប់ឈានចូល ថ្ងៃទី២ សីហា ២០១៦ នៅចំណុចផ្លូវលំចូលសាលាគោកបញ្ជាន់ ស្ថិតក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។

ជនសង្ស័យ ទី១រក្សាទុកសារធាតុញៀន មានឈ្មោះ តាក់ រតនះសម្បត្តិ ហៅហឿន អាយុ២១ មុខរបររើសអេតចាយ ស្នាក់នៅភូមិគោកបញ្ជាន់ ស្រុកស្វាយទៀប ខេត្តស្វាយរៀង និងជនសង្ស័យទី២ មុខសញ្ញាឆ្កិះសោបន្ទប់មានឈ្មោះ សែម សុខា អាយុ ២៧ឆ្នាំ មិនប្រាកដ ស្នាក់នៅភូមិគោកបញ្ជាន់។

តាមប្រភពពីសមត្ថកិច្ចបានឲ្យដឹងថា នៅមុនពេលកើតហេតុកម្លាំងបានជិះម៉ូតូល្បាតក្នុងភូមិសាស្ត្រខាងលើ ក៏ប្រទះឃើញជនសង្ស័យទី១ឆែករកថ្នាំញៀនប្រភេទម៉ាទឹកកក១កញ្ចប់តូច បន្ទាប់មកកម្លាំងបានក៏ជួបនិងជនសង្ស័យទី២ ហៅឃាត់សួរនាំឆែករកឃើញដែលសរសៃតូច សម្រាប់ឆ្កិះសោបន្ទប់ ក្រោយពេលឆែករកឃើញវត្ថុតាងរួចមកកម្លាំងក៏បានទាក់ទងទៅសមត្ថកិច្ចមូលដ្ឋានឲ្យមកយកជនសង្ស័យទៅប៉ុស្តិ៍។

ក្រោយពេលឃាត់ខ្លួនមកដល់ប៉ុស្តិ៍នគរបាលចោមចៅ ជនសង្ស័យទាំង២នាក់រួមជាមួយវត្ថុតាង កសាងសំណំុរឿងបញ្ជូនទៅជំនាញខណ្ឌដើម្បីចាត់ការបន្ត៕

ដោយ៖ សុខាសែនជ័យ