ខេត្តប៉ៃលិន៖ មនុស្សម្នាក់បានរងរបួស ដោយសាររថយន្ដដឹកសាំងក្រុមហ៊ុន ស៊ូគីមិច របស់វិចតូយ៉ា បើកចេញពីហាងសាំងបមិនប្រយ័ត្នត្រូវរថយន្តវីហ្គោលមួយគ្រឿងបើកបុកពេញទំហឹង។

ករណីរថយន្តវីហ្គោលបើកបុករថយន្តដឹកសាំងនេះបានកើតឡើងនៅវេលាម៉ោង៩ និង៣០នាទីព្រឹកថ្ងៃទី២ ខែសីហាឆ្នាំ២០១៦ នៅចំណុចមុខស្ថានីយប្រេងឥន្ធនៈ ស៊ូគីមិច តាមបណ្តោយផ្លូវលេស៥៧ ស្ថិតក្នុងភូមិអូរពិត សង្កាត់ទួលល្វា ក្រុងប៉ៃលិន ខេត្តប៉ៃលិន៕

បើកតាមសាក្សីដែលបានរួមដំណើរនៅក្នុងរថយន្តវិហ្គោលបានឲ្យដឹងថា មុននេះពេលកើតហេតុគេបានឃើញរថយន្តដឹកសាំងមួយគ្រឿងបានបើកបរចេញពីការ៉ាសសាំង វិចតូយ៉ា ក្នុងទិសដៅពីត្បូងបម្រុងឆ្លងជាតិលេខ៥៧ បត់ទៅលិច។ លុះឆ្លងបានបន្ដិចដោយមិនបានប្រុងប្រយ័ត្ន ស្រាប់តែមានរថយន្តមួយគ្រឿងម៉ាកវីហ្គោល ពណ៌ខ្មៅ បើកក្នុងល្បឿនលឿនមកដល់ចំណុចកើតហេតុចាប់ហ្វ្រាំងមិនទាន់ក៏ជ្រុលបុករថយន្តដឹកសាំងចំពាក់កណ្ដាលតែម្តង បណ្តាលឲ្យរបួសមនុស្សម្នាក់។ ចំណែកអ្នកបើកបររថយន្តទាំង២គ្រឿងមិនត្រូវបានស្គាល់អត្តសញ្ញាណនោះទេ។

ក្រោយកើតហេតុសមត្ថកិច្ចបានចុះទៅដល់កន្លែងកើតហេតុ និងឲ្យភាគីទាំងសងខាងធ្វើការសម្របសម្រួលគ្នា៕

ដោយ៖ ស សារ៉េត