ភ្នំពេញ ៖ បុរសម្នាក់បានបេីករថយន្ត Lexus RX400h មួយគ្រឿងក្នុងល្បឿនលឿនល្មម រួចក៏រេចង្កូតឡេីងខឿនពុះចែកទ្រូងផ្លូវទៅបុកបង្គោលភ្លេីងបំភ្លឺផ្លូវបណ្ដាលឲ្យរថយន្តផុងកាងមុខ រងការខូចខាត យ៉ាងដំណំ និងធ្វេីឲ្យអ្នកបេីកបររងរបួស ។ ហេតុការណ៍គ្រោះថ្នាក់ចរាចរណ៍ខាងលេីនេះបានបង្កឡេីងកាលពីវេលាម៉ោង១១ និង១០យប់ ថ្ងៃពុធ ទី១៤ ខែសីហា ឆ្នាំ២០២៤ ស្ថិតនៅតាមផ្លូវជាតិលេខ១ ក្នុងសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ។

តាមប្រភពព័ត៌មានពីកន្លែងកេីតហេតុបានឲ្យដឹងថា មុនកេីតហេតុ គេសង្កេតឃេីញរថយន្តម៉ាក Lexus RX400h ពណ៌ស ពាក់ផ្លាក លេខភ្នំពេញ 2BE-3066 ធ្វេីដំណេីរតាមបណ្ដោយផ្លូវជាតិលេខ១ ទិសដៅពីកេីតមកលិច ក្នុងល្បឿនលឿនល្មម ខណៈមកដល់ចំណុចកេីតហេតុ ស្រាប់តែរេចង្កូតឡេីងខឿនពុះចែកទ្រូងផ្លូវទៅបុកផ្ទប់បង្គោលភ្លេីងបំភ្លឺផ្លូវពេញទំហឹង បណ្ដាលឲ្យបង្គោលភ្លេីងមួយដេីមរងការខូចខាត រីឯរថយន្តបង្កបានរងការខូចខាតស្ទេីតែខ្ទេចមួយកំណាត់មុខ ទេីបទៅមុខលែងរួច ។ ក្នុងហេតុការណ៍នេះក៏បណ្ដាលឲ្យបុរសម្នាក់ ជាម្ចាស់រថយន្តបង្កបានរងរបួស ខ្លួនប្រាណ និងត្រូវបានរថយន្តសាមុបញ្ជូនទៅកាន់មន្ទីរពេទ្យដេីម្បីព្យាបាលរបួស ។
ក្រោយពេលកេីតហេតុ សមត្ថកិច្ចមូលដ្ឋានប៉ុស្តិ៍ច្បារអំពៅទី២ និងមន្ត្រីផ្នែកចរាចរណ៍ ផ្លូវគោក នៃអធិការដ្ឋាននគរបាលខណ្ឌច្បារអំពៅ ចុះមកសហការគ្នាធ្វេីការវាស់វែង និងស្ទូចយករថយន្តទៅរក្សាទុកបណ្ដោះអាសន្ន រងចាំហៅម្ចាស់រថយន្ត ឬតំណាងឲ្យចូលខ្លួនដោះស្រាយ តាមក្រោយ ៕ដោយ ៖ ភារ៉ា ដង្កោ