ភ្នំពេញ៖ ប្រធានគណៈកម្មាធិការជាតិអូឡាំពិកកម្ពុជាបានសន្យាជាមួយតំណាង សហព័ន្ធកីឡាជាតិទាំងអស់ថាចាប់ពីពេលនេះទៅលោកនឹងយកឧកញ៉ានៅស្រុកខ្មែរទាំងអស់មកធ្វើជាខ្នងបង្អែកសម្រាប់ជួយដល់ការអភិវឌ្ឍវិស័យកីឡាឆ្ពោះទៅកាន់ការប្រកួតប្រកួតកីឡាស៊ីហ្គេមលើកទី៣២ឆ្នាំ២០២៣ដែលព្រះរាជាណាចក្រកម្ពុជាធ្វើជាម្ចាស់ផ្ទះរៀបចំព្រឹត្តិការណ៍កីឡាថ្នាក់តំបន់ដ៏ធំនេះ ។

លោក ថោង ខុន ប្រធាន NOCC បានថ្លែងបែបនេះក្នុងពិធីជួបសំណេះសំណាលនិងប្រគល់កញ្ចប់ថវិកាដល់អត្តពលិកកម្ពុជា ដែលចេញទៅចូលរួមប្រកួតកីឡាអូឡាំពិក នៅទីក្រុងRIO ប្រទេសប្រេសីុល ដោយមានតំណាងមកពីគ្រប់សហព័ន្ធកីឡាជាតិទាំងអស់ចូលរួមផងដែរ ។

ក្រោយពីក្រោយពីបានស្តាប់នូវការលើកឡើងរបស់តំណាងសហព័ន្ធកីឡានីមួយៗរួចមកលោកប្រធានបញ្ជាក់ថា ស្តាប់ទៅស្តាប់មកសុទ្ធតែរឿងអត់លុយទាំងអស់ អ៊ីចឹងឲ្យតែមានប្រាកដជាធ្វើបានហើយមែនទេ? លោកថ្លែងថា “ខ្ញុំសូមសន្យាជាមួយ បងប្អូនតំណាងសហព័ន្ធកីឡាជាតិទាំងអស់ថា ចាប់ពីពេលនេះតទៅមុខប្រសិនបើ សហព័ន្ធមួយណាចង់បានលោកឧកញ៉ា អ្នកឧកញ៉ាណាម្នាក់ក្នុងប្រទេសកម្ពុជាសូមប្រាប់ខ្ញុំមកចុះខ្ញុំនឹងជួយយកឧកញ៉ានោះឲ្យមកធ្វើជាខ្នងបង្អែកសម្រាប់ការអភិវឌ្ឍក្នុងសហព័ន្ធកីឡាជាតិឆ្ពោះទៅរកការប្រកួតប្រកួតកីឡាស៊ីហ្គេមឆ្នាំ២០២៣” ។

លោក ថោង ខុន បានបន្ថែមថា ដល់ ពេលវេលាដែលស័ក្តិសមសម្រាប់ឲ្យអស់លោក លោកស្រីដែលជាឧកញ៉ាចូលរួម ចំណែកជួយស្តារនិងអភិវឌ្ឍវិស័យកីឡានៅកម្ពុជាក៏ដូចជាជួយដល់សហព័ន្ធកីឡាជាតិដែលលោកអ្នកគិតចង់ជួយហើយ។ ប៉ុន្តែសហព័ន្ធខ្លួនឯងប្រយ័ត្នមានលុយហើយធ្វើការអភិវឌ្ឍធនធានមនុស្សរបស់ខ្លួនទៅមុខមិនរួច ។ អត់ពិបាកទេរឿងលុយសំខាន់សហព័ន្ធខ្លួនយើងចង់បាននរណាបើមិនហ៊ានមកជួបខ្ញុំៗនឹងជួយរកឧកញ៉ាណាក៏បានដែរ ។

គួរបញ្ជាក់ថា នៅសល់តែប៉ុន្មានខែទៀតប៉ុណ្ណោះក្រសួងអប់រំយុវជននិងកីឡាចាប់ផ្តើម សាកល្បងបើកការប្រកួតល្បែងកីឡាជាតិឬហៅថា (NATIONAL GAMES) ជាលើកដំបូងរបស់ខ្លួនដើម្បីវាស់ស្ទង់សមត្ថភាពគ្រប់កម្រិតកីឡាជាតិប្រយោជន៍តម្រង់ទិសសហព័ន្ធកីឡានីមួយៗឆ្ពោះទៅកីឡាស៊ីហ្គេមលើកទី៣២ឆ្នាំ២០២៣។ ជាមួយគ្នានោះដែរគណៈកម្មាធិការជាតិអូឡាំពិកកម្ពុជាបាននិងកំពុងស្វះស្វែងកៀរគរពីគ្រប់ដៃគូពាក់ព័ន្ធទាំងថ្នាក់ជាតិនិងអន្តរជាតិធ្វើយ៉ាងណាឲ្យគេជួយដល់កម្ពុជាក្នុងការអភិវឌ្ឍវិស័យកីឡាឲ្យរីកចម្រើនទាន់សភាពការណ៍ជាក់ស្តែងមានទាំងធនធាមនុស្ស ហេដ្ឋារចនាសម្ព័ន្ធកម្រិតបច្ចេកទេស សម្រាប់បណ្តុះបណ្តាលអត្តពលិកប្រកបដោយចីរភាព៕

ដោយ៖ សារីម