ខេត្តព្រះវិហារ៖ បុរសម្នាក់បានស្លាប់ភ្លាមៗយ៉ាងអាណោចអាធ័មនៅនឹងកន្លែងដោយសារជិះម៉ូតូមិនប្រយ័ត្នទៅបុកគល់ឈើនៅលើគោយន្តកន្ត្រៃដែលខូចចតទុកចោលតាមដងផ្លូវ។
ហេតុការណ៍ជិះម៉ូតូបុកឈើលើគោយន្តកន្រ្តៃនេះបានកើតឡើងនៅវេលាម៉ោង០២ៈ០៥នាទីថ្ងៃទី២០ ខែសីហាឆ្នាំ២០២៤លើកំណាតផ្លូវជាតិលេខ៦២ ចន្លោះគីឡូម៉ែត្រលេខ៧៩-៨០ស្ថិតក្នុងភូមិអូរទ្រលោក ឃុំរមទម ស្រុករវៀង ខេត្តព្រះវិហារ។
ប្រភពពីសមត្ថកិច្ចបានឱ្យដឹងថា គ្រោះថ្នាក់ចរាចរណ៍នោះកើតឡើងរវាងម៉ូតូនឹងគោយន្តកន្ត្រៃដែលបើកបរស្របទិសគ្នាពីជើងទៅត្បូង ហើយគោយន្តកន្ត្រៃនោះបែកកង់ចតទុកចោលនៅលើចិញ្ចឹមផ្លូវក៏ត្រូវម៉ូតូបុកចំគល់ឈើនៅលើគោយន្តកន្ត្រៃនោះពេញទំហឹងតែម្តង។
អ្នកបើកបរម៉ូតូឈ្មោះហ៊ាន សុភា ភេទប្រុស អាយុ៣១ឆ្នាំ ជនជាតិខ្មែរមុខរបរមិនពិតប្រាកដ រស់នៅភូមិត្បែង ឃុំត្បែង ស្រុកកំពង់ស្វាយ ខេត្តកំពង់ធំ ជិះម៉ូតូគ្មានស្លាកលេខហើយទៅបុកគល់ឈើដែលនៅលើគោយន្តកន្ត្រៃលៀនចេញគែមប្រវែង៦តឹកបុកចំដើមទ្រូងខាងស្ដាំបណ្ដាលឱ្យស្លាប់នៅនឹងកន្លែងកើតហេតុភ្លាមៗ។
សមត្ថកិច្ចបន្តថា អ្នកបើកបរគោយន្តកន្ត្រៃបានរត់គេចខ្លួនបាត់មិនទាន់ស្គាល់អត្តសញ្ញាណនៅឡើយ។
ក្រោយកើតហេតុ សាកសពបានប្រគល់ឱ្យក្រុមគ្រួសារសាច់ញ្ញាតិយកទៅធ្វើបុណ្យតាមប្រពៃណី។ រីឯសម្ភារវត្ថុតាងបានយកទៅរក្សាទុកនៅអធិការដ្ឋាននគរបាលស្រុករវៀង។
ចំពោះគល់ឈើរក្សាទុកនៅប៉ុស្តិ៍រដ្ឋបាលឃុំរមទមហើយសមត្ថកចិ្ចជំនាញកំពុងស្រាវជ្រាវរកអ្នកបើកបរគោយន្តកន្ត្រៃបន្តដើម្បីរៀបចំសំណុំរឿងតាមនីតិវិធី៕ដោយ៖ ជីវ័ន្ត
